TABAL NAKUGANG
Gipadayag ni Olympian Mary Joy Tabal nga wala siya magtuo nga ang Philippine Amateur Track and Field Association (Patafa) dili mohilakip kaniya sa national team nga mokampanya sa umaabot nga 29th Southeast Asian (Sea) Games.
“It’s just like last year and also in 2015. But this time I did not really expect it because I thought I was part of the lineup for Sea Games already,” pasabot ni Tabal kagahapon sa usa ka welcome party nga gipasiugdahan sa Motor Ace Philippines.
Gipasabot sa 27 anyos nga lumad nga taga Brgy. Guba, Cebu City nga nagtuo siyang nasulod na siyang daan sa national team alang sa 2017 Sea Games human kini niya nabasahan sa mga mantalaan, human sa iyang kadaugan sa 40th Milo Marathon ug isip silver medallist sa matag duha ka mga tuig nga kompetisyon.
Matod ni Tabal nga magpadala sila og letter of reinstatement ngadto sa Patafa.
Ang kampo ni Tabal nagpadala sab og reinstatement letter sa miaging tuig alang sa iyang pagdagan sa Rio Olympics apan human ning maong lumba, gitangtang ra sab siya sa national squad.
Niadtong 2015, si Tabal nasulod sab sa national team alang sa Sea Games sa Singapore.
Batbat ni Tabal nga ang desisyon sa Patafa nga tangtangon siya sa national team giisip niyang usa lang ka pagsuway ug dili kini makaapekto sa iyang pagdagan.
“I want to represent the country. This test will motivate me to do more on my training,” batbat ni Tabal, kinsa molarga karong adlawa paingon sa Italy aron ipadayon ang iyang training sa Tuscany Training Camp.
Nagkanayon si Motor Ace Philippine president Jonel Borromeo nga kon dili mahilakip sa national team si Tabal ning higayuna, mangita sila og laing dagkong lumba nga kaapilan niini. Ang Motor Ace maoy sponsor ni Tabal.
“If the reinstatement does not happen, we will look for other bigger races to join. It’s not the end of the line for Joy (Tabal). Sea Games is what I call an honorable run because you are representing the population of 90 million,” matod ni Borromeo.
Si Philippine Sports Commission (PSC) Commissioner Ramon Fernandez midasig kang Tabal nga magpabiling lig-on taliwala ning maong isyu.
Matod ni Fernandez nga nakigsulti na siya kang Cebu City Mayor Tomas Osmeña kabahin sa sitwasyon ni Tabal.
Ang konseho sa siyudad sa Sugbo mopasaka og resulosyon nga maghimo og rekomendasyon nga mahilakip si Tabal sa national team.