‘SUPERTEAM’

Duha na lang ka mga daog ug makakulit na og kasaysayan ang Golden State Warriors isip labing unang kampiyon nga puwersa nga wala’y pilde sulod sa 16 ka mga duwa sa playoffs sa National Basketball Association (NBA).

Wala pa man tuod kini nahitabo apan ning puntoha, ang Warriors ninghangop na sa gilauman sa kadaghanan gikan kanila sukad sa paghiabot ni Kevin Durant sa ilang tugkaran – usa sila ka “Superteam.”

Ang Warriors ningmakmak pag-usab sa defending champion Cleveland Cavaliers, 132113, sa miaging adlaw aron pagposte og 2-0 nga bintaha sa best-of-seven championship series.

Sa tibuok playoffs, ang Warriors kasamtangang naggunit og 14-0 nga rekord nga sila ra ang bugtong nakahimo sukad masukad. Gilauman nga paingon na silang maghulma og dinastiya sama sa Boston Celtics ug Los Angeles Lakers kaniadto.

“They’re the best I’ve ever seen,” matod ni Cavaliers coach Tyronn Lue. “I mean, no other team has done this, right? And they constantly break records every year.”

Ang Warriors nakaangkon sa labing una nilang titulo sulod sa 40 ka mga tuig niadtong 2015 unya niadtong 2016, nabuak nila ang dugay nang rekord sa Chicago Bulls human sila nakakulit og 73-9 nga rekord sa regular season.

Sa finals niadtong 2015, ilang gipangbuntog ang Cavaliers unya niadtong 2016, nakaposte unta sila og 3-1 nga bintaha sa finals series apan sa wala damha, nabawsan gihapon sila sa Cavaliers.

Human sa masakit nilang kapakyasan sa 2016 finals, ang Warriors nagpalig-on og samot sa ilang puwersa pinaagi sa pagbira kang Durant gikan sa Oklahoma City Thunder.

Sa kumbinasyon nila ni Durant, kinsa kanhi MVP, three-point sharshooters Klay Thompson ug back-to-back MVP Stephen Curry ug defensive demon Draymond Green, ang Warriors nakahulma og puwersa nga giisip sa kadaghan nga grabe ka lig-on.

“You take one of the best teams that we had ever assembled last year, that we saw in the regular season and in the post-season, and then in the off-season you add a high-powered offensive talent like (Durant) and a great basketball IQ like that, that’s what stands out,” matod ni Cleveland superstar LeBron James kabahin sa Warriors.

“I’ve seen a lot of great teams and they rank right up there. They work well together. They have some guys that can actually lead a franchise without anybody else.”

Ang estilo ni Durant haom sa sestima sa Warriors hinungdan nga dali ra kining nahiluna sa bag-o niyang balwarte.

“We all got better and we have worked well together throughout the season,” matod ni Durant.

“One day it may be me, one day it may be Steph, Klay, Draymond. You never know who will come up and show up for us.”

Ning maong season, ang Warriors nakarehistro og 67 ka mga daog sa regular season nga nakapahimo kanilang No.1 team.

Sa playoffs, ilang gipangsiruhan ang Portland Trailblazers, San Antonio Spurs ug Utah Jazz.

We have to defend our home court. It definitely is a must win. – Cleveland Cavaliers forward Kevin Love