BONIEL NAA PA SA CUSTODY SA PNP

Laing kaso ang gitakdang ipasaka batok kang Bohol Provincial Board Member Niño Rey Boniel sunod semana.

Matod ni Sr. Supt. Jonathan Cabal hayan kasong parricide ang ilang ipasaka batok kang Boniel sunod semana sa dakbayan sa Lapu-Lapu tungod sa giingong pagpatay sa asawa niini nga si Bien Unido Mayor Gisela Boniel.

Ang opisyal naa pa sa custody sa kapulisan bisan sa mando sa korte nga di siya itanggong kay way warrant of arrest.

Si Niño Rey ug mga kauban gipasakaan og kasong kidnapping, serious illegal detention ug physical injuries tungod sa giingong pagdagit sa iyang asawa, pagdagmal niini ug sa higalang si Angela Leyson.

Ang lawas sa mayor giingong gihulog sa kadagatan sa dakbayan sa Lapu-Lapu.

Samtang, andam motestigo si Reolito “Etad” Boniel batok sa iyang ig-agaw nga board

member kinsa maoy iyang gitudlo nga utok sa pagpusil patay sa iyang kaugalingong asawa, kinsang lawas padayon pang wa makit-i sa awtoridad human kini gilabay sa kadagatan sa may isla sa Caobian, dakbayan sa Lapu-Lapu.

“Oo, andam ko niana mo- witness. Tua naman koy

affidavit gibuhat, kato nalang akong ipakuan sa husgado. Akong barugan nga siya gud (Niño Rey),” ni Reolito sa mga tigbalita sa dihang gikuhaan og habig sa posibilidad nga siya kuhaon nga state witness.

Sa dihang gikahinabi sa mga tigbalita, giangkon ni Reolito nga dako ang iyang pagbasol nga naapil ang iyang pangan sa krimen.

“Nagbasol gyud ko og dako, Sir, kay nagtuo man ko og tarong ang iyahang pagkuan kay kana laging iyang pag- text nako nga “Gaw, ari diri” kay naa man lage na siyay sugo nga magpatrolya sa kadagatan sa illegal fishing, usa man pud ko niya nga kuhaon as operator sa pumpboat. Unya karon, wa ko magdahum nga ingon ana diay, nagplano na diay siya ana ni Mayora Boniel nga iya diayng patyon,” ni Reolito. / JPP