‘PUSHER’ PATAY SA BUY BUST SA CCPO

Patay ang usa ka high value drug target atol sa usa ka buybust operation kagahapon sa kaadlawon sa Maya 1, Sitio Kalinaw, Barangay Sambag 1, dakbayan sa Sugbo.

Ang suspek mao si Melvin Chavez, hamtong, lumad sa Negros Island apan kasamtangan nga nagpuyo sa naasoy nga dapit.

Atol sa operasyon sa City Drugs Enforcement Unit ug City Intelligence Branch sa Cebu City Police Office ala 1:55 sa kaadlawon kagahapon dihang napatay sa kapulisan si Chavez human nisuway pagsukol.

Si Chavez giingon nga nalambigit sa nasikop niadtong nakalabay nga tuig nga sila si PO1 Gem Querubin ug Sharon Abella.

Duha ka buwan nga gimonitor ug gipanid-an si Chavez kinsa nakuhaan og usa ka kalibre .38 nga revolver, usa ka dako nga pakete sa shabu, tulo ka medium ug unom ka gagmay.

Aduna kini’y gibug-aton nga 40.42 gramos nga shabu nga aduna’y Dangerous Drugs Board (DDB) value nga P140,840.

Samtang kritikal ang kondisyon sa usa ka tawo nga gipusil pasado alas 7 niadtong Biyernes sa gabii sa sityo Kulbeta, Barangay Mambaling, dakbayan sa Sugbo.

Ang biktima nga samdan sa ulo giilang si Ricky Ebrada, 25, kinsa wa na igkita dul-an sa usa ka tuig ug bag-o lang nagpakita sa dapit.

Sigun sa pasiuna nga imbestigasyon nila ni SPO1 Winston Ybañez ug mga kauban sa Homicide Section nga kalit lang nahanaw sa dapit si Ebrada. / HBL/JFT