KAPIN SA P.6M SHABU SAKMIT
Pito ang nasikop samtang kapin sa P600,000 nga kantidad sa shabu ang nasakmit sa kapulisan sa managlahing operasyon sa lungsod sa Consolacion niadtong Biyernes.
Alas 11:00 sa gabii dihang nasikop sila si Renante Rivera alyas Nante, 33, residente sa Tayud, Liloan, ug si Ismael Reuyan alyas Mokoy, 39, residente sa Pulpogan 1, Consolacion pinaagi sa buy-bust operation sa East Binabag, Tayud.
Sa pakisusi sa kapulisan, gihimo ang operasyon sa Consolacion Police Station inubanan sa Municipal Drug Enforcement Unit (MDEU) sa naasoy nga dapit.
Nakuha gikan sa duha ang usa ka kalibre .38 nga revolver, nagkadaiyang bala, ug 11 ka gramos nga shabu nga nagkantidad og P129,800 base sa Dangerous Drugs Board (DDB) Value.
Samtang 30 minutos sa dili pa ang naunang operasyon, nasikop usab sa samang operatiba ang duha ka mga giingong naninda og ilegal nga drugas sa Barangay Cansaga.
Ang mga dinakpan mao sila si Rey Cris Ermac, 30, ug Mario Ponce, 44, parehong residente sa maong barangay.
Usa ka buy bust operation usab ang gihimo diin nakuhaan ang duha og nagkadaiyang drug paraphernalia ug 31 gramos nga shabu o nagkantidad og P365,000 base sa DDB value.
Alas 5:00 sa hapon sa susamang adlaw sa Pulpogan 1, dihang laing tulo usab ang nasikop pinaagi sa buy bust operation.
Ang mga nasikop mao sila si Rodney Gomez alyas Onie, 30; Junmar Pautang, hingkod; ug si Reyna Mae Bacus, 23, pulos mga residente sa nahisgutang lugar.
Nakuha gikan sa mga dinakpan ang 11 gramos nga shabu nga nagkantidad og P129,800 sa DDB value.
Pasakaan og kasong kalapasan sa Sec. 5 ug 11, 12, Art. 2 sa Republic Act 9165 kon ang Comprehensive Dangerous Drug Act, ang mga nadakpan nga pulos nabalhog karon sa prisohan. /