Crime of passion
Ang 'crime of passion' gihulagway nga usa ka krimen nga nakomiter gumikan sa sobrang kalagot o kapungot o ba kaha naghinobrang pangabubho o selos tali sa duha ka binuhat nga adunay relasyon. Usahay kini giplano o wala giplano apan nakomiter ang krimen gumikan sa dili mapugngan nga emosyon bunga sa iyang nahibaloan o nasaksihan sa iyang gikarelasyon.
Makadaghan na kita makadungog og samang kaso. Usa sa prominenteng kaso niini ang kadtong pagpatay ni Philippine Benevolent Missionaries Association (PBMA) supreme master Ruben Ecleo Jr., sa iyang asawa nga si Alona. Kon kasado ang magti-ayon mahulog kini og parricide case ug kon manag-uyab o live in lang, mahulog sa murder o homicide.
Kining nahitabo sa magtiBoniel, sila si Bohol Provincial Board member Nino Rey ' In-In' Boniel ug ang iyang asawa nga si Bien Unido Mayor Gesila 'Gesille' Boniel, maoy 'crime of passion'. Sa pagtagpi-tagpi sa kutay sa ebedensiya ug mga pamahayag sa mga saksi, nagtumbok kang PB Member Boniel nga maoy nihimo sa krimen. Kuwarta o selos? Ang unang saksi mao ang higala sa mayor nga si Angela Leyson kinsa misaysay nga gisulod sila og mga tawo sa lawak sa usa ka beach resort sa Bien Unido niadtong Miyerkules sa kadlawon. Matod pa ni Leyson nga ang maong mga tawo gipanguluhan sa bana mismo, diin gibataan og duck tape ang iyang baba ug gitiruhan og stun gun o gipakuryentihan ang iyang liog.
Wala na siya masayod sa sunod nga nahitabo kay gipugos siya pagpasakay sa mga tawo ni Boniel paingon sa Tubigon. Laing saksi nga si Reolito ' Etad' Boniel, ig-agaw sa bana, nagkanayon nga nagpatabang kaniya si PB Boniel nga isakay ang mayor sa pumpboat. Samtang naglawig sila sa kadagatan, nag-estorya pa ang magti-ayon ug dayon gipusil sa bana ang asawa. Pagkatamay niini, gisulod nila sa pukot ug gibutangan og bato nga adunay gibug-aton nga 30 kilos ug gilabay sa Caubian island sa Lapu-Lapu City.
Kuwarta o financial problem o adunay third party? Ang bana ray nasayod nganong kini iyang gihimo.