Dakong hagit

Nadani ang interest sa publiko sa balita kabahin sa giingong kamatayon ni Bien Unido, Bohol Mayor Gisela Boniel. Giakusahan ang iyang bana nga si Provincial Board Member Niño Rey Boniel nga maoy nagpatay sa iyang asawa. Si Angela Leyson, suod nga higala sa mayor, maoy nisumbong ngadto sa kapulisan kabahin sa giingong pagdagit sa provincial board member sa iyang asawa kay kuyog sila atol sa hitabo. Ang duha giingong nagbuwag na diay sukad niadtong Pebrero.

Giingon nga niangkon si Niño Rey ngadto sa kapulisan nga patay na ang iyang asawa. Iyang gitumbok ang iyang ig-agaw nga si Reolito Boniel nga maoy nipusil sa iyang asawa.

Apan si Reolito nisumbalik, niingon nga si Niño Rey ang nangunay pagpusil sa iyang asawa samtang luwan sa pumpboat ug ilang gihug sa kadagatan sa Caubian islet sa dakbayan sa Lapu-Lapu.

Kagahapon, giundang una ang search kay lawom kaayo ang lugar nga dapit nga nahulgan sa lawas. Kon di molutaw ang lawas ug mapalgan, di makairog ang kaso? Trabaho sa mga pulis ang pagtigom og mga ebedensya aron mapalig-on ang kaso base sa mga pamahayag sa mga tawo nga nasayod sa hitabo, gikan sa pamahayag ni Leyson ngadto sa kang Reolito.

Kon unsaon sa pagdispuga sa mga ebedensya bisan wa pa ang lawas, maestablisar nga nahimo ang krimen ni Niño Rey usa ka dakong hagit sa kapulisan.

Hagit tungod kay gamhanan nga tawo ang giakusahan sa usa ka krimen. Mas maayong maninguha sila nga anhi sa Sugbo ang paghusay sa kaso.

Apan kon gusto usab sa pamilyang Boniel nga di maakusahan nga ilang gigamit ang ilang impluwensya sa dagan sa kaso, di sila mobabag nga di sa Bohol ipahigayon ang husay. Ilang pasagdan ngamoligid ang hustisya, pabor man o di sa provincial board member.