Upat ka “T”
Usa ka bantugang pari, si anhing Padre Pedro Arrupe, nagkanayon: “… Kon kinsay imong gihigugma, unsay mingsakmit sa imong handurawan, motandog sa tanan. Mao kini magbuot kon unsay makapabangon nimo sa buntag, unsay imong pagahimuon sa kagabhion, unsay imong buhaton sa katapusan sa semana, unsay imong basahon, kinsay imong kaila, unsay makapadismaya kanimo, ug unsay makapahingangha kanimo inubanan sa kalipay ug pasalamat…”
Bitaw ang gugma maoy magbuot sa tanan. Kon unsa o kinsa ang imong gihigugma mao kini magbuot sa imong kinabuhi. Praktikal kaayo, sumala pa ni Padre Arrupe, ang gugma sa Dios kay makapadiosnon ni nato.
May upat ka “T” ang gugma sa Dios nga mabasa nato sa ebanghelyo. Gitawag ang ebanghelyo og “gamay nga ebanghelyo” ilabina ang unang bersikolo kay mao kini ang kalangkoban sa tibuok ebanghelyo: “Kay gihigugma gayod sa Dios ang kalibotan sa ingon nga gihatag niya ang iyang bugtong Anak…”
Mao kini ang unang “T” kun “tukmod”. Gugma nagtukmod sa Dios sa pagpadala sa iyang bugtong Anak di pagkakuwang sa kinaiya sa Dios. Mabasa nato sa sunod bersikolo ang sunod nga “T”. Ang “tahas” sa Anak mao ang pagluwas, dili paghukom. Makaluwas ang Diosnong gugma gikan sa kaulipnon sa sala. Apan ang yawi nga mo-abri sa maong gugma mao ang pag“Tuo”.
Mituo sa Moises sa Dios Binasi sa Exodo 34:4-9; Daniel 3; 2 Taga-Corinto 13:11-13; ug Juan 3:16-18 diha sa libro sa Exodo. Nangayo siyag pasaylo sa kalapasan sa mga Israelita samtang gibitbit niya ang Napulog ka Sugo. Susama ang dinamismo sa tulo ka “T” diha ni Moises sa atong nabasa sa ebanghelyo ni Juan.
Mabasa nato diha sa ikadung sulat ni San Pablo ngadto sa mga taga-Corinto ang ika-upat nga “T”: “Ang grasya sa Ginoong Jesucristo, ug ang gugma sa Dios, ug ang panagdait sa Espiritu Santo maanaa kaninyo.” Ang gugma sa Amahan nga maoy nagtukmod kaniya sa pagpadala sa iyang bugtong Anak nga mianhi aron pagluwas, nagtubod diha sa Santisima Trinidad.
Ang gugma nga gipanag-ambitan tali sa Amahan ug Anak mao ang Espiritu Santo. Diha sa pagmugna sa Dios sa kalibutan, miambit na ang tawo sa gugma sa Dios. Diha sa bunyag sa ngalan sa Amahan, ug sa Anak, ug sa Espiritu Santo, miambit kita sa kinabuhi sa Dios. Nahimo tang mga sinagop nga anak sa Dios ug gihatagan og kahigayonan sa pagpuyo og Diosnong kinabuhi.
Mga tinuoray nga Kristohanon lamang ang mapasalamatong modawat sa gugma sa Dios gikan sa Santisima Trinidad. May uban nga di gyod kadawat nga may tulo ka persona. Alang nila tulo ka Dios kini. Gisuwayan nilag tugkad ang maong misteryo ug kay di matugkad, ilang gikahon sa tawhanong panghunahuna. Mahimo natong itandi kini sa “3-in-1” nga kape. Mahimo sad natong gamitan kini og “mathematics.” Moingon sila “one plus one plus one equals three” apan moingon pod ta nga “one times one times one equals one.”