For friend, for love

Nagdali kong miadto sa eskuwelahan kay basig ma-late ko sa una kong subject aning buntaga. Nadugay man gud kog mata kay duna koy giasikasong school assignment kagabii. Walking distance lang ang gipuy-an kong boarding

house sa university nga akong gitunghaan. “Good morning!”

Nakalingi ko. Si Sir Rowan diay nga nagsunod nako. Mihunong ko paglakaw ug gihuwat ko si Sir Rowan. Nagpahiyomay mi. “Nagdali ka man, Grace?” “Sus, Sir, buntag na kaayo kong nakamata, uy.”

Giestorya ko kang Sir Rowan ang hinungdan. Igo lang siyang mitingsi. Milubyok ang duha ka kandiis sa iyang mga aping. Nakapasamot kini sa iyang kaguwapo. Hamis pa gyud siyag kutis. Morag wa mag-edad og kuwarenta. Batan-on gihapon siyang tanawon.

“Di ka pa ma- late, uy, Grace. Kaduol ra anang eskuwelahan.”

Nakapangawot na lang ko sa akong ulo. Hinay ming nanglakaw si Sir Rowan.

“Di man gud ko gustong ma- late, Sir. Mao pa gani pagsugod sa klase, unya malate na?”

Miyangu-yango si Sir Rowan. Usa siya sa mga propesor sa university nga akong gitunghaan. Nuon wa ko siya mapropesor sa akong mga subjects. Maestro siya sa Engineering course, samtang ako, Political Science ang gikuha kay may plano ko nga mo- proceed ug Law course. Taga Davao si Sir Rowan. Nagpuyo sab siya og boarding house. Managsilingan ra ang mga boarding house nga among gisak-an.

“Komusta ang bag-o mong mga propesor, Grace?”

“Well, as usual. Dunay buotan, duna say isog.”

“Di man gyud na kalikayan, Grace. Ako gani, mag-inestrikto man sab usahay. Gusto namong mga propesor nga makat-on gyud ang among mga estudyante, nga magtuon gyud sila sa ilang mga klase. Kon pakitaan gud mog kaestrikto, magtuon man gyud mo. Ayog kasab-an kon way ika- answer!”

Mitukikig katawa si Sir Rowan. Nahikatawa na lang sab ko.

“Bitaw, Sir, no? Mahadlok sab ming mga estudyante kon di magtuon kay di man makatubag kon inyong pangutan-on panahon sa klase?”

“Mao lagi. Ug, Grace, kadaghan na tika ingna nga ayaw na ko tawgag Sir kon kita rang duha. Di ko komportable ana. Friend na man ta, di ba?”

Mitando ko. Naghilom na lang ko hangtod nga nahiabot mi si Sir Rowan sa eskol. Aw, Rowan na lang diay.