GIPAAGI OG BALAK
Misteryuso ug hilumon kon ihulagway ni Leah Chua, 29, si Socrates Itumay, Jr., 32, sa dihang nagtungha pa sila sa kolehiyo.
Apan luyo niini, dunay nakapadani ni Leah kang Soc ug human sa walo ka tuig, naangkon sa lalake ang matam-is nga “Yes!” sa hinigugma.
Unsay gibuhat ni Soc nga nakapakilig ni Leah?
Ang mga balak sa kanhi ulitawo.
Nagsugod ang love story sa duha ka binuhat sa University of the Philippines Cebu, siyudad sa Sugbo. Maguwang og duha ka tuig si Soc ni Leah.
Ang lalake, 4th year college niadtong higayona, samtang, ang babaye, 2nd year college.
Matod ni Leah misteryuso si Soc gumikan sa pagkahilumon niini.
“I have already thought of him as nerd because he plays games all the time (Dota-Defense of Ancients),” paambit ni Leah sa Superbalita Cebu. Gumikan sa pagkamauwawon,
gipadayag ni Soc ang iyang pagbati kang Leah pinaagi sa love letter, text message ug pagpadala og mga balak sa email.
Sa unang pagkakita ni Soc ni Leah, nitatak na sa iyang panumduman ang kaanyag sa dalaga ug nadani sa unang pahiyom niini.
“At times, she has this interesting way of talking, and I can never forget that first smile,” saysay ni Soc. Samtang si Leah, nadani sa pangutok ni Soc, usa ka software engineer.
“I like the mysterious effect when I first met him. But when I started to know him, I was very impressed with his intelligence,” dugang ni Leah. Human sa kolehiyo, nabatyagan ni Soc nga wala nay laing babaye nga gusto niya makauban sa tibuok kinabuhi.
Sa unang tulo ka tuig sa ilang relasyon, gibati ni Soc ang pagka insecure ug kanunay masuko bisan kon way rason, labi na dihang nagtrabaho na
sa call center si Leah.
Apan taliwa niini, nasagubang sa duha ang selos ug insecurities.
Niadtong Disyembre sa miaging tuig, ni- propose si Soc kang Leah ug naangkon sa ulitawo ang matam-is nga “Yes!” sa dalaga sa usa ka kan-anan sa siyudad sa Sugbo.
Yano lang ang proposal ni Soc nga gisugdan og panihapon ug kini nagustohan ni Leah, usa ka privacy solutions
manager sa Estados Unidos. Pinaagi sa seremonyas sa kasal sa St. Therese Parish, Barangay Lahug, siyudad sa Sugbo niadtong Mayo 14, 2017, ang duha nahimong usa ug nisaad nga mag-inunongay sa kasakit ug kalipay, kahayahay ug kalisod, kabahandianon ug kakabos hangtod sa kinabuhi nga way kataposan.
Gawas nga gisaulog ang selebrasyon sa gugma, ang seremonyas nahimo usab nga dalan nga makauban ang mga kabanay sa isig ka pamilya nga dugay nang wala nila igkita ug nibiyahe pa gikan sa lagyong lugar aron mosaksi sa espesyal nga okasyon. /