CAVS BUHI PA
Gipagawas sa Cleveland Cavaliers ang kasingkasing sa defending champions aron pakgangon ang kamangtas sa Golden State Warriors, 137-116, kagahapon sa Game 4 sa National Basketball Association (NBA) Finals.
Aron maangkon ang labing una nilang daog sa best-of-seven series, ang Cavaliers nagpauwan og three-point bombs, namuak og mga rekord, si LeBron James nagpakatap og triple-double samtang nipupo og 40 puntos si Kyrie Irving.
“We have championship DNA,” matod ni James, kinsa mibuak og rekord ni Magic Johnson pinaagi sa iyang ikasiyam nga triple-doubles sa finals.
“We showed that tonight. We just kept our composure. We shared the ball, we moved the ball and defensively we were physical. It’s one game.”
Sa kasaysayan sa NBA, wala pa’y nakabangon gikan sa 0-3 nga biya aron dag-on ang usa ka series.
Apan wala maghunahuna niini ang Cavaliers.
“Our mindset is to go out there and get one,” asoy ni James, kinsa nimugna og 31 puntos, 10 rebounds ug 11 assists.
Sa halftime, ang Cavaliers nakatigom na og 86 puntos nga usa ka rekord sa finals.
Ning puntoha, ang Cavaliers anaa na sa sitwasyon diin nakahimo sila og dakong surpresa sa finals sa miaging season dihang nakabangon sila gikan sa 1-3 nga biya aron lupigon ang Warriors. Ang Cavaliers maoy bugtong nakahimo niini.
“Believeland is not going to give up and we’re going to keep fighting. We’re going to keep scrapping,” asoy ni Cavaliers coach Tyronn Lue.
Si Kevin Durant, kinsa mibalhin sa Warriors gikan sa Oklahoma City Thunder sa tinguha nga maangkon niya ang iyang labing unang korona, nimugna og 35 puntos aron pangulohan ang Warriors.
Apan ning higayuna, minos ra og suporta nga nadawat si Durant gikan sa iyang mga kaabag sa opensa nga sila si Stephen Curry ug Klay Thompson.
Si Curry igo lang niamot og 14 puntos samtang si Thompson igo lang sab nihatag og 13 puntos.
“Just one of those games,” matod ni Curry. “Not going to overreact to one. Obviously I can play better and want to play better and will play better.”
Si Kevin Love nimugna og 23 puntos lakip na niini ang unom ka three-point shots alang sa Cavaliers.
Ang series mobalik sa balwarte sa Warriors sa Game 5 nga ipahigayon karong Martes (RP time).
“I’ve got to start getting ready for the next game now. I mean it,” batbat ni James.
Just one of those games. Not going to overreact to one. Obviously I can play better and want to play better and will play better. – Golden State Warriors guard Stephen Curry