DRAYBER NI BONIEL MIANGKON
Niangkon na ang drayber sa pamilyang Boniel nga usa sa siya sa midayong sa lawas ni Bien Unido Mayor Gisela Boniel niadtong Hunyo 7 sa kaadlawon nga giputos sa puti nga habol nga iyang gihulagway nga buhi pa niadtong tungora.
Si Randel Lupas unang mihimakak nga nakahibawo siya sa nahitabo kang Mayor Boniel sanglit niadtong tungora natulog siya ug gipukaw nalang kini sa dihang gipahatod na sa pantalan sa Tubigon si Angela Leyson, ang higala sa mayora nga wala gilakip sa pagpatay.
Matod ni Lupas, gimandoan siya ni Board Member Niño Rey Boniel sa pagyayong sa lawas ni Gisela ug gihatod kini sa giandam nga pumpboat sa luyo sa Bien Unido Dive Camp Resort.
Sa iyang banabana nga luya na si Mayor Gisela sa dihang gialsa kini padung sa pumpboat tungod sa igo sa stun gun sama sa nahiaguman ni Angela Leyson.
“Gipukaw ko nila nga patabangon kog dayong, giputos na si Mam sa puti nga habol pero buhi pato siya ato unya luya lang ba. Human gi ingnan ko ni Board Member nga ipahatod si Angela sa Tubigon,” matod ni Lupas.
Samtang, si Roilito Boniel alyas Etad ang gitumbok nga boat man miangkon usab sa interview sa media sa Police Regional Office (PRO) 7 gahapon nga upat sila sa pump boat kini naglangkob ni Jay-r Boniel, igagaw usab sa board member.
Pag-abot sa kadagatan sa Caubian Island nipahibawo si Board Member Niño nga didto na patyon ang iyang asawa diin mismo siya ang mipusil niini dayon gihagbong sa dagat.
Human mahulog ang lawas ni Mayor sa dagat, nagpahatod na kini sa Barangay Punta Engaño sa dakbayan sa Lapu- Lapu, dala ang iyang armas aron mopauli sa ilang panimay sa Barangay Guadalupe.
Gitunolan matod pa siya og usa ka envelope nga dunay sulod nga kwarta nga mobalor og P10,000 isip suhol.
“Pagnaog niya iyang gitunol ang sobre iyang giingon nga imo nana, suhol, ayawg saba dayon lakaw na siya,” asoyni Roilito.
Apan nianang pagka hapon sa Hunyo 7 samtang nag-inom sila, nanawag, matod pa ang board member kaniya aron pasibaton.
Matod sa asawa ni Etad nga si Jona kanunay nga motawag si In-in (Niño Rey Boniel) sa cellular phone sa iyang bana aron pasibaton tungod kay duna nay police nga nangita niya. “Ingon siya nga sibat na diha gaw ako lang bahala sa imong pamilya gaw,” tug-an ni Jona Boniel.
Human masayod nga dunay pulis nga nangita dinhi na nag- panic ang asawa tungod kay nagduda na siya nga dunay gihimong dautan ang iyang bana ug ang board member.
Wala na usab niya dawata ang P10,000 nga suhol human niya masayri nga gikan ni sa dautan. Iyang awhag sa board member nga angkunon na ang krimen nga iyang nahimo ug dili na iamong ang way labot sama sa iyang bana.
Bisan pa man sa mando sa korte sa Bohol nga pabuhian si Niño Rey Boniel tungod kay illegal ang pagsikop niini nga walay warrant of arrest wala motuman niini ang Police Regional Office 7.
Matod ni Chief Supt. Noli Taliño nga duna pa silay kasong parricide nga ipasaka sa korte sa siyudad sa Lapu-Lapu.
Kagahapon, si Presidential Legal Counsel Atty. Salvador Panelo personal nga mibisita sa Regional Intelligence Division 7 aron magpakisayod sa kaso sa mga gipangtumbok nga responsable sa pagpatay kang Mayor Gisela Boniel. /