Walay bagyo, habagat miepekto hinungdan sa pag-uwan: Pagasa

Gumikan sa habagat, masinati sa Sugbo ang mga pag-ulan sa hapon ug gabii hangtod sa Septiyembre, sumala sa Philippine Atmospheric, Geophysical and Astronomical Services Administration.

Si Romeo Aguirre, weather specialist sa Pagasa Mactan, nipasabot ang kanunay nga thunderstorms maoy ilhanan sa habagat nga ang epekto mao ang daghang ulan sa kahapunon ug kagabhion. Masinati kini hangtod sa Septiyembre sukad gideklarar sa Pagasa ang panahon sa ting-uwan sugod sa Mayo 30.

Kon tinghabagat, delikado sa dagkong mga bawod ang kasadpang bahin sa nasod sama sa Palawan, Panay ug Iloilo, dugang ni Aguirre sa Superbalita Cebu kagahapon Si Provincial Disaster Risk Reduction and Management Officer Baltazar Tribunalo nipasidaan sa mga molupyo duol sa kasapaan ug kabukiran nga dili mokompiyansa gumikan kay delikado ang kanunay nga pag-ulan sa baha ug pagdahili sa yuta.

“Moingon gani si Pagasa nga dunay dakong ulan ang sunod ana ang dakong bul-og sa baha, kay ang Cebu flashflood ra ba dayon ta, pahawa dihang dapita labi na kadtong mga nagpuyo duol sa mga katumpagan o landslide prone areas ,” pahimangno ni Tribunalo sa publiko.

Iyang gitumbok ang Transcentral Highway ug Barangay Manipis sa siyudad sa Talisay nga delikado sa landslide ug pagpangatagak sa dagkong mga bato gikan sa ibabaw.

Si Tribunalo nipahinumdom usab sa mga maestra ug barangay kapitan bahin sa localized hazards, diin mahimo sila makasuspenso og klase kon malantaw nga mameligro ang ilang mga estudyante o molupyo.

“So, dili huwaton nga nagbaha na una pa papaulion,” dugang sa opisyal.

Kon naa na ang baha, mangita og dapit nga luwas.

Siya nidugang nga angay pahimuslan usab sa mga tawo ang ulan pinaagi sa pagsawod gamit ang dagkong mga butangan aron dunay mapundo nga tubig.

Siya niawhag usab sa publiko nga dili magpasagad sa paglabay sa ilang mga basura labi na ang mga plastik kay mosampong kini sa mga kanal ug wa nay kaagian ang tubig nga moresulta sa baha.

“Dili lang ta maghulat unsay buhaton sa gobiyerno, dapat ang mga tawo dunay buhaton,” dugang ni Tribunalo.