Grab ug sexual harassment

Usa ka babayeng pasahero nga bag-o lang nakapasar sa Licensure Examination for Teachers (LET) nipasakag kasong sexual harassment batok sa usa ka driver sa Grab, usa sa mga Transport Network Vehicle Services (TNVS) nga nag-operate dinhi sa Sugbo.

Ang kaso sa biktima nga hangtod karon anaa pa sa “state of shock” gipasaka atubangan sa Land Transportation Franchising and Regulatory Board (LTFRB) 7 ug lagmit husayon ning semanaha.

Sumala pa sa biktima, nahitabo kini niadtong Hunyo 4 sa alas 9 sa kagabhion. Ang iyang higala maoy ni- book sa Grab gikan sa Mandaue padung sa Cebu South Bus Terminal.

○○○ Samtang sud sila sa sa sakyanan, nag-estoryahay sila sa iyang higala sa mga personal nga mga butang hangtod nga nanaog ang iyang higala sa may Carreta Elementary School sa siyudad sa Sugbo.

Sa dihang nag-inusara na lang siya, ang drivers sa Grab mao na ang nakig-estorya kaniya, nikupot sa iyang kamot, niagbay ug ginamit ang bukton, gisangkil ang iyang dughan. Gihapohap ang iyang buhok ug gihagkan, gihikap ang iyang nawong ug gihagkan ang iyang agtang ug ang tuo ug wala nga aping.

Sumala sa biktima, nagbuotbuot sa paghunong ang drayber duol sa usa ka unibersidad sa siyudad. “Nagbuotbuot siya og hunong sa sakyanan. Gipalong ang suga unya gi-lock ang sakyanan. Didto siya niagi sa tunga sa car seats sa atubangan padung sa back seat.”

○○○ Mao kini karon ang usa sa mga suliran nga nitumaw tungod sa pagkuyanap niining mga TNVS. Ang maong kaso anaa na sa LTFRB 7. Angay natong sundon kay lagmit nga daghan nang nanghitabo sama niini apan wa lang moreklamo ang mga biktima.

Usa ka pundok sa mga abogado nga gitawag og Lawyers for Commuters Safety and Protection (LSCP), kansang founder mao si Atty. Ariel Inton Jr. kanhi LTFRB board member, maoy milaban sa biktima sa sexual harassment sa drayber.

Sa matag adlaw nakong sakay og taxi, nasayod ko nga ang mga drayber sa taxi maoy labing suhito sa problema sa nasud. Sila sab ang dunay solusyon. Karon, ang driver sa Grab maoy problema.