Pagkab-ot ug kagawasan
Dugay na nga naangkon sa atong nasod ang hingpit nga kagawasan gikan sa kamot sa mga langyaw. Gisaulog nato ni matag tuig. Sa matag petsa 12 sa Hunyo. Pero kung maghisgut gani ta og kawad-on, mas daghang Filipino ang maisip nato nga di gyud gawasnon hangtod karon. Mao nga matag panahon sa eleksiyon ang kawadnag-una nga isyu nga ibandilyo sa mga politiko kay lage ang kinabag-an sa mga botante mga kabus man.
Nakabaton tinuod ang nasod ug kagawasan sa pagpadagan sa renda sa pangagamhanan, pagpa barug ug kaugalingong gobyerno apan pakyas gihapon sa pagpalingkawas sa kinabag-an sa papolasyon gikan sa kawad-on. Kini unta nga kagawasan gilauman sa tanan nga mahimong hinagiban batok sa kagutom apan daghan pa gihapon ang nagilaid sa tumang kalisod. Pero di kini babag nga mopadayon kita sa pagpanghinaot nga sa umaabot nga selebrasyon sa atong kagawasan mahingpit na gyud ang tanan.
MARAWI
Nagpadayon ang gubat sa Marawi City. Nakasiguro ko nga sama nato dinhi may mga seremonyas nga himoon pagpakayab sa bandilang Pilipino
Simbolo sa atong kagawasan. Ang pangutana hangtod kanus-a maangkon sa atong mga igsoong Kristiano ug Muslim ang kagawasan batok sa terorismo sa maong siyudad ug sa ubang bahin sa nasod. Manghinaot nga matapos na ang giyera didto nga nikalas na ug daghang kinabuhi ug niapiki ug liboan ka pamilya.
CAOBIAN
Nakuyog ko sa ika duhang hugna sa pagsawom sa kadagatan sa isla sa Caobian papagpangita sa patay'ng lawas ni Mayor Gisela Boniel.
Kauban sa 16 ka divers mao si Alfie Fernandez usa ka batid sa maong propesyon. Sa una nakong pagtan-aw lahi ang iyang pamayhon itandi sa ubang divers niadtong higayona. Sa pag- interview nako niya akong nasayran nga diay suod siya sa mayor ug sa bana niini nga si Board Member Niño Rey Boniel. Si Alfie personal nga swimming instructor sa anak sa magtiayon. Mao nga emosyonal ang iyang pagsalmot sa sinawmanay didto.
Matod ni Alfie, wa gyud siya magtoo nga mahitabo kini. Sa akong hubad layo ra kaayo nga mahitabo nga siya nagtudlo ug langoy sa anak sa mayor. Unya karon molangoy si Alfie pagpangita sa inahan sa anak nga iyang gitudloan sa paglangoy. Tulo ka dive ang gihimo sa 16 ka diver apan way patayng lawas nga naugkat. Gisundan pa ni pagka Sabado apan way nahitabo tungod sa kalawom sa maong dagat.