Daginutang inahan
Miyerkules. Alas siyete sa buntag. Giduol ni Manny ang iyang inahan nga nagtukar sa piyano. “Ma, lisod ba gyud kaayo sabton ang akong pahimangno nimo?” matod ni Manny, “Nganong mopapel pa man gyud ka sa mga maid? Lisod ba gyud usbon imong naandang batasan?” Nagdalag sukmat ang tunada sa iyang mga pulong ngadto sa iyang Mama Daisy.
“Ha? Unsay buot nimong ipasabot?” ni Daisy nga miurong pagtukar sa piyano ug milingi sa iyang anak.
Nahimutang ang piyano sa eskina sa sala sa dakong balay nga gihimong lodging house sa tag-iya niini. Dinhi gisaulog ang reyunyon sa mga anak ni Daisy nga usa na ka biyuda. Duha na ka adlaw sila dinhi nga naatol sa pagsaulog sa adlawng natawhan ni Manny nga maoy labing adunahan sa iyang mga anak. Kaniadto sa gagmay pa ang upat niya ka anak grabe kaayo ka daginutan si Daisy tungod kay sayo man siyang nabiyuda. Nangahente og yuta, alahas ug aplayanses aron makabuhi ug makapa edukar sa mga anak.
“Dili ko gusto nga ma- spoil ang atong reunion, Ma. Nia ta ining pinakanindot nga dapit tumoy sa bungtod sa baryo Malubog ning dakbayan. Overlooking sa tibuok palibot diin nindot ang talan-awon nga dulot sa kinaiyahan. Kinahanglan nga kalipay ang atong bation, dili kapikal!” ni Manny.
“Unsa man lagi akong sala?” ni Daisy nga nagtibi ug nagpatuso-tuso nga way kalibutan sa napikalan ni Manny.
Mi- check in sila dinhi sa Green Meadow Mountain Resort nga may dakong swimming pool sa Martes sa hapon, sa miaging adlaw Ania sila tanang upat ka managsuon. Si Mario, ang kinamaguwangan, usa ka mananambal. Si Maricor, ang ikaduha, usa ka psychologist. Siya, Manny, usa ka arkitekto. Ug si Annie, ang kinamanghuran, usa ka CPA. Kuyog nila ang ilang tagsa-tagsa ka kapikas, mga anak ug mga maid. Lahi nga lodging house kining gi-estaran nila, kay way restawran. Apan may dakong kusina nga kumpleto sa mga gamit. Ang mga guest magdalag bawon nga lutounon para sa ilang pagkaon. Nagluto ang upat ka maid sa ilang panihapon adtong Martes sa gabii.
Unya sa pagsusi ni Manny sa kusina kaganihang buntag, way giluto nga mga bag-ong putahe ang mga katabang kay dihay daghang subra nga mga pagkaon nga salin sa miaging gabii. Mitug-an ang mga maid nga gimandaran sila ni Daisy nga dili palutuon og bag-ong putahe ug initon lang ang subrang mga sud-an kagabii para sa pamahaw karong buntaga.
“Mao nay pulong ni Mama?” gisukot ni Manny si Lenlen, ilang katabang. Diha sa ilang duol ang tulo ka maid sa iyang mga igsuon.
“Oo, Sir!” hapit magkadungan pagtubag ang upat ka maid. Mao nga giadto dayon ni Manny ang ilang inahan.
“USBA na nang imong kinaiya, Ma, uy! Wa na ta magkalisudlisod. Importante kining adlawa nga nag-reyunyon atong pamilya. Kinahanglan makaon ang tanang putahe nga gipangandaman sa atong mga bawon nga lutounon. Kon may subra, bahinon. O ipanghatag sa mga empleyado sa resort,” ni Manny.
Mitulo ang mga luha ni Daisy nga misulti, “Wa man ko makigsulti sa mga maid!” Namakak siya ug unya mibakho.
“Ayna lang pagnigar, Ma. Lisod ba gyud tumanon akong diyutayng hangyo?” ni Manny nga pinasingka. Mibiya siya sa sala ug mipaingon sa kusina.
“Sunod gani, ayaw na ninyo paminawa si Mama. Lutoa ang angay lutuon,” giingnan ni Manny ang mga maid.
Nagkarakara ang mga katabang pag-abli sa refrigerator. Nasigpatan ni Manny si Mama Daisy niya nga nagpingoy-pingoy nga misulod sa lawak niini sa resort.