USC 'Top 10' sa Psychology quiz
Nakaabot sa Top 10 ang mga Psychology major sa University of San Carlos (USC) sa ika-30 nga tinuig nga Psychology Quiz sa Psychological Association of the Philippines - Junior Affiliates (PAPJA).
Gilangkoban ang kuponan sa USC nila Abelardo Chaves III ug Lloyd Brendon, mga
fourth year na, ug nila Shane Balandra ug Wynne Michael David Gogo, pulos third year.
Binansayan ni Calvin Kieth Calvadores, nakig-indigay ang mga Carolinian sa laing 70 ka mga tulunghaan lukop nasud sa SMX Convention Center ni'ng bag-o pa lang. Ang maong inter-school
quiz bowl, inatngan sa tinuig nga PAPJA convention, naglangkob sa industrial ug organizational psychology, clinical psychology, counseling, psychometrics ug behavior statistics. Nasudnong kahugpungan ang PAPJA sa mga tinun-an sa Psychology sa nagkalainlaing mga kolehiyo ug unibersidad sa Pilipinas, Sanga kini sa Psychological Association of the Philippines (PAP).
Moabot sa 141 ka mga tulunghaan, ubal sa ocho mil ka mga delegado, ang misalmot sa maong panagtigom karong tuiga, 35 nila gikan sa USC nga gipangulohan ni Dr. Glenn Glarino, Ph.D., ilang department chairman.
“Nagsilbing taytayan ang PAPJA convention namo nga makat-on pa kabahin sa Psychology ginamit sa kahimtang sa atong nasud,” miambit si Gogo, kinsa kanunay maapil sa Dean's List.
Samtang, alang kang Galon, “nakapa-isa (ang panag-abot) sa akong kaamgohan sa kahulogan sa panglawas sa hunahuna sa Pilipinas.”
Nakapalig-on ang kalampusan sa kuponan sa USC sa pagkahimutang sa programa niini nga usa sa mga nag-una sa Sugbo ug sa tibuok nasud.