SALUDAR KAGING; PILDI NI LANDERO

Mikunhod ang poruhan ni Vic Saludar nga makapanuktok alang sa world title human sa iyang surpresang

split decision nga kapildihan batok kang Robert Landero sa main event sa Engkwentro dinhi sa Mandaue: Visayas vs. Mindanao

boxing promotion sa miaging gabii sa Mandaue City Cultural and Sports Center.

Gumikan sa kapildihan, gilaumang modakin-as paubos ang World Boxing Organization (WBO) No.2 minimumweight ranking ni Saludar. Si Saludar natagak sa 14-3, 9KOs nga rekord samtang si Landero misaka sa 9-1-2, 2KOs nga baraha.

Sa top supporting bout, gi-

pukan ni Vince Paras (11-0, 9 KO’s) si Jimboy Haya (10-4-2, 6 KO’s) pinaagi sa unanimous

decision aron angkunon ang bakanteng WBO Asia Pacific Youth fr. flyweight title.

Ang igsuon ni Saludar nga si Froilan (25-2-1, 15KOs) mirehistro og 9th round TKO nga kadaugan batok kang Salatiel Amit (10-3-2, 7 KO’s).

Sa 1st round pa lang, gitumba na ni Froilan si Amit pinaagi sa one-two nga kumbinasyon.

Nakabarog og balik si Amit apan natumba na sab kini pagbalik human maigo ang iyang apapangig sulod lang gihapon sa 1st round.

Nakabangon gihapon si Amit ug padayong misukol apan natumba na sab kini pagbalik sa 5th round. Nalukapa na sab si Amit sa

8th round ug bisan grabe na nga kastigo ang iyang nadawat, misukol gihapon kini.

Apan sa hinapos nga bahin sa 9th round, giundang na sa referee ang away aron malikay si Amit sa delikadong kahimtang.

Sa lain pang away, si Robert “Inggo” Paradero (14-0, 8 KO’s) mikulit og 4th round KO nga kadaugan batok kang Charlie Malupangue (5-3-3, 4 KO’s).

Samtang sa away sa mga babaye, si Casey Morton sa Sacramento, California midaog batok kang Thai Phannaluk Kongsang pinaagi sa desisyon.