Kadaut sa mga landslide sa Sirao grabe

Ugmang adlawa, atol sa pagbalik ni Cebu City Mayor Tomas Osmeña sa City Hall human sa biyahe niini sa laing nasod, itunol ni Konsehal Jerry Guardo, deputy mayor for infrastructure, ang incident report sa padayon nga pagdahili sa yuta sa Barangay Sirao, bukirang bahin sa dakbayan sa Sugbo.

Si Guardo, kinsa nibisita sa barangay, nibutyag nga natabunan sa yuta ang dalan human kini midahili.

Usa ang Sitio Langub nga gitan-aw nga adunay tubod ilawom sa yuta ug didto nibuto kini ug nidahili ang yuta hinungdan nga nimugna og bag-ong sapa.

Matod ni Guardo nga duha ka taytayan ang iduso niya sa City Engineering aron tukoron sa naasoy nga dapit isip hulip sa spill way nga di na magamit tungod kay napuno na sa yuta ug di makaagi ang tubig.

Usa ni sa mamahimong maagian paingon sa Barangay Pulangbato, ubos sa mao nga barangay.

Dungan sa pagsumiter ni Guardo sa incident report, hangyuon usab niya ang mayor nga mopatawag og executive meeting inubanan sa mga hingtungdang ahensiya aron masuta ang pamilya nga apektado, panimalay ug kon asa kini sila mamahimong ibalhin.

Nasayran nga nideklarar na ang Mines and Geosciences Bureau (MGB) 7 nga di luwas ang Sirao nga puy-an.

Mopalabang usab og resolusyon si Guardo sunod semana aron ipasuta sa city engineering ang kahimtang sa barangay gym kon mamahimo pa ba ning magamit o gub-on na lang.

Kini human nakita ang mga liki ug buak nga mamahimong risgo kon magduwa ang bata sulod sa gym.

Matod ni Guardo, di luwas ang barangay hall sa Sirao ug angay mangita ang opisyal sa barangay og luna nga mamahimong kabalhinan nila diin andam ang syudad nga mopalit sa luna.

Aduna na’y luna nga nasuta ang Syudad sa Barangay Guba nga mamahimong magamit nga kabalhinan sa mga pamilya apan nagdumili ang mga residente tungod sa kalayo niini.

Dugang ni Guardo nga niingon na ang mayor nga susama sa biktima sa sunog, makadawat ang apektado sa maong barangay og P20,000 nga financial assistance ug lain usab ang construction materials.

Padayon ang clearing operation sa City Engineering ug Department of Public Works and Highways (DPWH) 7 sa mga dalan nga apektado sa pagdahili sa yuta. /