E-train di haom sa Cebu City
Nagpanikad na karon ang dakbayan sa Sugbo nga magamit na ang prototype hybrid electric road train aron makatabang kini sa pagpakunhod sa nagkagrabing kahuot sa dagan sa trapiko sa siyudad ilabi na niining pagsugod sa adlaw sa tingklase. Kini human nga si Fortunato dela Pena, secretary sa Department of Science and Technology (DOST), mibutyag nga naayo na ang kadaot sa maong road train nga namugna niadtong bulan sa Abril tungod sa nahitabong lunop sa Block 27 sa North Reclamation Area nga maoy nahimutangan niini.
Kini nga electric road train nga gidonar sa DOST ngadto sa dakbayan adunay lima ka hut-ong sa sakyanan nga gisumpay-sumpay nga makakarga og 250 ka mga pasahero sa matag biyahe.
Sa ato pa kon matingob sa pagsakay ang ingon aning gidaghanon sa pasahero hayan dali ra unya silang maabot sa ilang tagsatagsa ka destinasyon.
Dili na usab unya sila matagbaw og paabot, mag-ilog ug maggukod-gukod sa mga PUJ o mga gagmayng depasaheroan nga dali ra usab kaayong mapuno. Base sa atong gilakbitan sa unahan dako gyud kaayo kini og ikatabang.
Pero yuna ra. Ato man tuod ning gihangop, apan dili ba kaha masukwahi ang pagtuo sa dakbayan ug makadugang na hinuon kini sa kahuot sa trapiko tungod sa iyang gidak-on ug gitas-on nga motadlas sa gagmay ug pi-ot nga mga dalan?
Dili kaha mabara ang dagan sa trapiko kon magsigi kini og hunonghunong nga mag-pick up ug magpakanaog og mga pasahero nga duol ra ang destinasyon?
Bisan gani ang South Road Properties (SRP) nga may bukad nga dalan dili usab lohika nga maagi-an niini kay layo ra man kini sa mga residensiya.
Sa pagkakaron, dili pa haom kining road train alang sa syudad hangtod nga dili pa kini maandaman og dakong dalan--butang mga mogahin og hataas nga panahon.