Your love inspires me

Di gyud ko mopalta sa pagpanimba kada Domingo sa hapon. Sa di pa ko moadto sa akong gitrabahoan, makig-estorya una ko sa Diyos. Hilom kong maghilak ug mangayog pasaylo. Giisip ko na kining tulumanon sa akong kinabuhi.

Hapit n mogabii sa akong paggawas sa simbahan. Dunay mga tawo, babaye ug lalaki nga nakaila nako. Ako ray ilang gitan-aw. Naghunghongay sila. Unya mokatawa. Ang uban mangyamiid. Nakahibawo ko nga ako ang ilang giestoryahan. Apan naanad na ko sa ilang pagpanglibak ug pagpanaway nako.

“Di uroy mauwaw nga moatbang sa Diyos, no?”

“Guwapa unta. Giusikan lang ang hitsura!”

“Nag-eskuwela-eskuwela pa kunohay!”

Nadungog nako kining tanan gikan kanila. Apan wa ko sila tagda. Mipadayon ko paglakaw. Duol ra ang gipuy-an namong eskuwater. Malakaw lang kini gikan sa simbahan nga akong gisudlan. Apan wa ko makapugong sa pagpanghupaw. Kahilakon ko. Nahunahuna ko si Papa nga mibiya namo ni Mama. Di unta ko maingon ani ron.

Yaga-yagaan ug yam-iran. Para sa mga tawo nga nakaila nako, hugaw kong pagka babaye. “Salome, ikaw na ba na?” Miigot ang pultahan nga playwod sa among balay pagtulod ko ani. “Oo, Ma.” Gibutang ko sa lamesa ang sud-an nga gihapit ko pagpalit sa karenderya sa merkado nga maagian nako paingon sa among balay. Gihutoy sa gahing ubo si Mama. Gipatumar ko siyag tambal.

“Hungitan ta lang ka, Ma.” Gihagkan ko sa aping ang pinangga kong inahan. “Nagpalit kog pansit.”

Mitando si Mama ug may luha ang iyang mga mata. Milingiw ko kay kahilakon sab ko. Nakasabot ko sa iyang gibati. Gimingaw siya kang Papa. Iyang gisulti nako nga si Papa ra ang lalaki nga iyang gihigugma ug mahalon niya kini hangtod sa iyang kamatayon.

Miadto ko sa kusina. Nagsukad ko sa gilung-ag ko nang daan nga kan-on sa wa pa ko moadto sa simbahan. Unya nagbutang kog pansit sa platito. Morag wa koy kadasig nga mipaingon sa gamay nga kuwarto ni Mama aron pakan-on na siya.

Pagka gabii, naligo kog usab. Nag-ilis og sinina nga miniskirt. Nagbutang og perfume sa akong lawas. Nang- lipstick. Natulog na si Mama sa akong pagbiya sa among balay. Moadto na ko sa night club nga akong gitrabahoan.