2 KA KANHI PULIS NASIKOP SA BUY-BUSTS
Duha ka kanhi pulis ang nasikop niadtong Sabado atol sa operasyon sa kapulisan batok ilegal nga drugas sa dakbayan sa Sugbo.
Usa ka retired police ug nataktak sa serbisyo human ni- absent nga wala magleave o AWOL ang nasikop sa managlahing operasyon sa kapulisan.
Alas 11:00 sa buntag, napusasan si Joseph Glenn Casona Burlas, retirado nga pulis, atol sa usa ka buy-bust operation sa C'est La Vie Pention sa dan Juan Luna ug dalan Osmeña,
Apil sa napusasan mao ang kauban niini nga sila si Gefrey Casona Bulado ug Daniel Beltran Aves diin nakuhaan sila og duha ka pakete sa medium size sa gituohang shabu. Lakip nga nasakmit ang boodle money nga P20,000 nga maoy gigamit sa maong buy-bust operation.
Matod sa hepe sa Police Station 2 sa Cebu City Police Office (CCPO) nga si Chief Insp. Maria Theresa Macatangay nga nahinabi sa Superbalita Cebu niingon nga mao kini ang nagpadayon sa negosyo sa ilado nga drug
lord sa Sugbo nga si anhing Jeffrey "Jaguar" Diaz.
Hinuon, padayon pa gisubay nila ni Macatangay ang rason nganong nalambigit sa maong ilegal nga negosyo ang retirado nga pulis ug kanus-a kini nagsugod.
Gitambayayongan ang maong operasyon sa Regional Special Operations Group (RSOG) 7 ug Regional Drug Enforcement Unit (RDEU) 7.
Upat ka oras bag-o ang maong operasyon dihang nasikop ang level 2 drug pusher ug High Value Target (HVT) kinsa usa ka kanhi police office 1 nga si Aaron Estarte alyas Vandolph, 34, residente sa Purok 8, Barangay Kamputhaw, dakbayan sa Sugbo.
Nasayran nga 2012 dihang ni AWOL si Estarte.
Alas 7:00 sa buntag sa samang adlaw, napusasan si Estarte sa Sitio Maracas, Barangay Lahug pinaagi sa usa ka buy-bust operation.
Nasakmit gikan kaniya ang upat ka medium size nga pakete sa gituohang shabu, duha ka gagmay nga pakete ug nagkadaiyang paraphernalia.
Nakuha usab ang P3,000 nga boodle money nga gigamit isip buy-bust money.
Dugang ni Macarangay nga susama ni Burlas, padayon ang pagkuha nila og impormasyon sa background sa mga suspek sa negosyo sa ilegal nga drugas.
Kalapasan sa Republic Act 9165 o Comprehensive Dangerous Drugs Act ang atubangon nga kaso sa mga nasikop kinsa natanggong na karon sa prisohan.
We're still conducting background investigation to complete our report
Chief Insp. Maria Theresa Macatangay sa text message ning mantalaan