Lubnganan gilungkab?

Nautingkay ang mga residente sa Barangay Binaliw, siyudad sa Sugbo human ilang nahibaw-an nga dunay lungon gikan sa nitso ang gitabonan og trapal sa dalan sa miaging adlaw.

Si Kapitan Wilson Bacor sa Binaliw nagkanayon nga naalarma ang mga tawo kon unsay gitabonan duol sa taytayan nga daplin sa karsada.

Dihang gihiling sa mga residente, dason sa kapitan, ilang nahibaw-an nga usa kini ka lungon nga adunay mga bukog nga sulod.

Sa imbestigasyon sa barangay, nasuta nga ang maong lungon gikan sa pribadong sam-ang sa Binaliw.

Matod ni Bacor nga base

sa iyang nahibaw-an, gipanag-iya sa usa ka ginganlan og 'Padernos' ang lubong nga gihabwa gikan sa private cemetery.

Gitug-an sa kapitan nga nagsuhol ang tagtungod og tawo nga maoy pakuhaon sa bukog sa namatay sa maong menteryo aron ibalhin og lain nga bone chamber.

Gipasabot ni Bacor nga balaud sa maong sam-ang nga ang tagtungod sa namatay ang mohipos sa lungon ug nitso sa higayon makuha na ang bukog.

Gipadayag sa pangulo sa barangay nga kaadlawon gikuha ang ang maong lungon gikan sa menteryo ug niadtong ala- 1:00 sa hapon niadtong Biyernes nadiskobrehan sa mga tawo.

Gihulagway sa kapitan nga usa ka trak de karga ang giingong gisakyan sa maong lungon kansang parte niini gihiktan og pisi diin ang pikas tumoy gihigot usab sa tulay hinungdan nga sa pagbulhot sa sakyanan nahulog ang karga.

Walay klaro nga nakasaksi sa hitabo sanglit giatol usab sa wala pa mailhi nga drayber nga magmingaw ang palibot.

Human sa insidente, gihangyo ni Bacor ang tagdumala sa menteryo nga ibalik lang una sa ilang lugar ang lungon samtang wala pa kini makuha og balik sa tagtungod.