WAITING AREAS SA TRAYSIKOL, SIKAD IPABALHIN
Nihangyo ang Department of Public Works and Highways (DPWH) sa Cebu City Transportation Office (CCTO) nga pangitaan og laing waiting areas ang mga traysikol ug sikad nga naa sa giila nga diversion roads sa laing dry run rerouting ug kon masugdan ang pagpatukod sa P683 milyones nga underpass project.
Ang DPWH 7 niila sa 17 ka national ug local roads nga magsilbi nga alternatibo nga agianan sa higayon sugdan na ang pagtrabaho sa proyekto.
Kini naglakip sa mga dalan sa Caimito, Ma. Gochan, Ganciang, F. Llamas, E. Sabellano, Macopa, I. Tabura, Cabreros, Tagunol, C. Padilla, Katipunan, Tres de Abril, N. Bacalso Avenue (sud sa 500 m radius), Bayanihan, J. Tabura, A. Gabuya, ug F. Jaca.
Tinguha sa DPWH 7 nga mahawanan sa nakaparada nga mga sakyanan, traysikol ug sikad ang maong mga dalan aron hapsay ang pag-agi sa mga sakyanan nga gi- reroute labi na ang naa sa mga dapit nga 'No Parking Anytime' ug 'Tow Away Zones.'
Si Francisco Ouano, operations chief sa CCTO, namahayag nga nisanong sila sa hangyo sa DPWH 7.
Matod niya gi- survey na nila ang maong mga dapit ug gipangitaan og paagi nga makapadayon og pamasahero ang mga drayber og sikad ug traysikol nga dili makababag sa kadalanan.
“Ato na nang gipangitaan og paagi, dili pwede mawagtangan sila og panginabuhian. Atong balansehon para everybody happy,” pahayag ni Ouano sa pakighinabi sa Superbalita Cebu kagahapon.
Sud ning semanaha, sugdan na sa DPWH 7 ang pag-ayo sa libaong nga mga dalan nga gamiton isip diversion roads.
Si Ouano niingon nga 4,300 metro kwadrado ang gidak-on sa ayuhunon sa DPWH pinaagi sa pag-aspalto o 540 metric
tons sa aspalto ang gamiton. Si Engr. Roy Dela Cruz, project
engineer sa DPWH, nagkanayon nga dihang gihimo ang unang
dry run niadtong Hunyo 7, nabantayan nga nahinay ang pagirog sa mga sakyanan gumikan sa mga libaong, nag- park nga mga sakyanan, sikad ug traysikol sa pipila ka mga dalan nga gigamit isip alternative routes.
“Atong ayuhon ang potholes para ig divert sa traffic, smooth na ang dagan sa vehicles,” dugang ni Dela Cruz.
Si Ouano una nang namahayag nga dili sila mosugot og laing dry run ug sugdan ang pagtrabaho sa underpass kon dili mahuman og ayo sa DPWH 7 ang pipila ka libaong nga mga dalan nga gamiton isip diversion roads. Ang 700 metros nga underpass nga dunay two-way, two lane depressed structures pabarugon sa interseksyon sa N. Bacalso Avenue ug dalan F. Llamas nga gipaabot masugdan karong buwana ug mahuman sud sa 18 ka buwan. /