Drainage master plan sa Talisay ipresentar ni Gullas

Ipresentar karong adlawa ni Konsehal Rudy Cabigas, chairman sa committee on infrastructure, ngadto ni Mayor Eduardo Gullas ang dugay na kaayong comprehensive master drainage plan sa Talisay.

Kini maoy sulbad unya sa suliran sa baha diha sa siyudad.

Ang drainage master plan nahuman niadto pang 2013 apan hangtod karon wa mapatuman.

Gumikan niini, si Gullas nangita na sa plano tungod kay gusto kini niyang ipatuman ubos sa iyang administrasyon.

Ang pamahayag ni Gullas nunot sa ilang gipatuman nga tulo ka tuig nga moratorium sa paghimog gagmay ug dagko nga mga kompaniya nga gustong mo- develop og subdivision sa ilang siyudad.

Matod ni Gullas nga kinahanglang ipatuman ang moratorium aron ayuhon una nila ang ilang mga karsada ug labaw sa tanan ang ilang drainage tungod kay nunot sa pagtumaw sa mga subdivision migrabe na usab ang ilang baha tungod kay way klarong drainage.

Ang mayor niingon nga niadtong kongresista pa siya sa unang distrito ug si Konsehal Socrates Fernandez pa ang mayor sa Talisay, ilang gipahimo ang drainage plan agig sulbad sa baha sa siyudad.

Si Cabigas niadtong higa_ yona anaa na sa katapusan niyang termino ug siya gihapon ang chairman sa committee on on infrastructure, niingon nga gisugdan ang comprehensive drainage master plan niadtong 2010 ug nahuman sa 2013, gani ang siyudad nigasto og P5 milyones sa paghimo lang sa feasibility study.

Matod ni Cabigas nga kon ipatuman kini, ang siyudad mogasto og P128 milyones niadtong higayona, apan mas dako na kini kon ipatuman karong panahona tungod kay nimahal naman usab ang mga materyales.

Si Engr. Ariel Araw-Araw planning officer niadtong higayona ug mao karoy pangulo sa Office of the Building Officials (OBO), niingon nga nasuhito siya sa plano.

Apan siya misugyot nga mas maayong unahon ni Gullas ang pag- develop sa gawasanan sa tubig sa Cansojong creek paingon sa Tangke ngadto na sa Barangay San Roque.

Gipasabot ni Araw-Araw tan-awon og balik ang plano tungod kay posibling ang maigo sa drainage di na mahimo karong panahona.

Kini tungod kay posobleng hawan pa kaniadto ug wa pay building ug balay. Apan karon, anaa na tungod kay kapin naman sa upat ka tuig ang nilabay.

Hinungdan nga siya misugyot nga unahon ang pag-ayo sa gawasanan sa tubig tungod kay usa kini sa hinungdan nga mobaha ang pipila ka dapit sa Talisay diin way gawasanan ang baha paingon sa dagat.

Karong adlawa, si Cabigas nipahibawo nga moadto siya sa buhatan ni Gullas aron ipakita ang comprehensive drainage master plan sa mayor.

Si Gullas nagplanong mopatawag sa iyang city engineer nga si Engr. Gamaliel Vicente aron hisgutan ang plano ug mapundohan kini sa sunod tuig.