Andam ang Fire Dept. sa sunog
Andam ang Cebu City Fire Department (CCFD) nga moresponde sa bisan unsa nga sunog, bisan kon naa sa tag-as nga building.
Mao kini ang pasalig ni Fire Marshall Rogelio Bongabong Jr., subay niining insidente sa nasod sa London diin usa ka high rise flat ang nasunog diin pipila ang patay ug adunay padayon nga gipangita.
Apan gibutyag ni Bongabong nga kuwang gihapon ang gamit sa kabomberohan bisan og wa nagnihit og fire trucks.
Matod ni Bongabong, nahinabi sa Superbalita Cebu, nga adunay duha ka fire ladder ang CCFD, usa niini mamahimong moabot hangtod sa 7th floor samtang usa sa 18th floor.
Gipasabot usab niini nga di na kinahanglan nga mopalit pa og dugang hagdanan tungod kay di na unya kini masakto sa dan sa Sugbo ug di na magamit.
Hinuon kini nitataw nga tanang tag-as ug bag-o nga building sa Sugbo pasado sa standards sa fire safety bisan ang labing tag-as nga condominiums sa may Mango Avenue.
Dugang ni Bongabong nga istrikto sila sa fire safety standards sa matag edipisyo sa Sugbo sa dili kini nila hatagan og certificate of compliance.
Kinahanglan nga ang matag establisemento adunay sprinklers matag andana, fire extinguisher, fire exit ug nihimo kinig fire ug earthquake drill.
“If di sila sigurado nga mogana ang ilang sprinkler, pwede sila motawag sa bombero para i- priority og inspect nato ang ilang building,” matod ni Bongabong alang sa mga residente sa mga high rise building.
Kinahanglan usab adunay smoke alarm ang building ug first responder team nga maoy unang moresponde sa panahon nga adunay insidente nga mahitabo.
Bisan og wa nagkuwang sa fire truck inubanan ang fire volunteers ug barangay fire trucks, apan matod ni Bongabong, kinahanglan og dugang breaker apparatus, radyo ang kabomberohan.
Siya niawhag usab nga magdugang og fire hydrants sa Sugbo aron dunay magamit sa higayon naay sunog.