874 naalagaran sa medical mission

Naatiman ang 874 ka mga lumolupyo sa Barangay Panadtaran, lungsod sa San Fernando, Sugbo sa dihang gibalik sa Solid Earth Development Corp. (SEDC) ang medical mission niini human sa tulo ka tuig sukad sa 2006.

Miabag si kapitan Ricardo Reluya sa pagpatapok sa iyang tagibarangay nga kapahimuslan ang serbisyo ug libreng mga tambal gikan sa SEDC ug Taiheiyo Cement Philippines, Inc. (TCPI).

Gilista daan ang mga pasyente sa 24 ka mga barangay health workers nga naka-apil sa quarterly health seminars nga gipahigayon sa TCPI sa miaging tuig, ug midawat sa dugang pang mitunga sa tukmang adlaw.

Natagad sa mga doktor ang 388 ka mga hamtung na ug and 486 ka mga ubat, uban sa 206 ka mga optical cases ug 72 nga dental, matod ni Mitzie Almira I. Carin, tagduma sa human resources and administration sa SEDC.

Nabatyagan sa mga hamtong ang mga isyu sa altapresyon, panakit sa kalawasan, artraytis, kumon nga pagubo ug sip-on, paghapdos sa kuto-kuto, problema sa pagpangihi, ug mga nuka-nuka, matod ni Dr. Ildebrando Estella, doktor sa TCPI

Pabalikbalik nga hilanat ang nabatyagan sa kabataan, pagkalampayatot nga nanginahanglan og mga bitamina, kumon sab nga pag-ubo og sip-on ug mga nuka-nuka, siya midugang.

Nitagad sa mga pasyente sila si Dr. Easter Estella, Debra Capulong, Normacita Infantado, ug Galileo Velasquez, ug mga dentista nga sila si Dr. Pearl Angeli Cabauatan. Phil Raymond Oacan ug Liza Mae Canada.

Nangunay sa pagpahapsay sa kalihukan si SEDC director Hiroyoki Sakakibara uban ni Takashi Miyashita, senior vice president sa TCPI, ug sa mga kawani ug miboluntaryo nga mga magtutudlo ug taga-barangay.

Mipasalamat og dakong uyamot sa SEDC ug TCPI si Kapitan Reluya, bana ni Mayor Neneth G. Reluya, sa misyon nga una na’ng mitagad sa 989 nga taga-Panadtaran pagka-Nobyembre 2006, laing 1,115 pagka-Septyembre 2011 ug 1,044 pagka-April 2014.

Naatiman na sa mga medical mission sa SEDC ug TCPI ang 22,179 ka mga pasyente, nga mokabat na sa katlu-an sa populasyon sa lungsod sa San Fernando base sa 2015 census nga anaa sa 66,280.

/ Tampo nga hulagway ■ MISYONG MEDIKAL: Natagad ning mga lumolupyo sa Barangay Panadtaran sa lain na sang medical mission nga gipadala sa duha ka mga kompanyang namatigayon sa San Fernando.