PINIRISO NANUNGGAB; 5 ANGOL
TARGET MAO ANG LAING PINIRISO
Samdan ang 5 ka mga piniriso sa Cebu Provincial Detention and Rehabilitation Center human gidunggab sa usa ka bilanggo nga naghuramentado alas 6 niadtong Sabado sa gabii. Si Roberto ‘Bobby’ Legaspi,
officer-in-charge warden sa CPDRC, nibutyag nga ang mga biktima way plano nga mopasaka og kaso batok sa suspek nga bilanggo nga gibalhog na sa isolation cell.
Wa nila nganli ang mga pangan sa biktima ug suspek samtang sugdan pa ang imbestigasyon nga pangulohan ni Chief Insp. Franco Rudolf Oriol, deputy commander sa Provincial Public Safety Company.
Si Legaspi niasoy ang suspek nisaka sa selda nga nahimutangan sa unang biktima ug kalit kini gidunggab gamit ang upat ka pulgada nga gitas-on sa lansang ug gunting.
Duha ka mga bilanggo nga kauban sa selda sa unang biktima nisuway og tabang apan gidunggab sila og apil.
Laing duha pa ka mga bilanggo sa laing selda ang niuwang usab apan gidunggab usab sila og apil.
Atol sa hitabo, dunay relihiyuso nga kalihokan ang gipahigayon sa quadrangle sa CPDRC sa Barangay Kalunasan, siyudad sa Sugbo.
Ang mga biktima pulos nakaangkon og mga samad dinunggaban sa lainlaing bahin sa ilang lawas. Dili hinuon grabe ang ilang mga samad nga naangkon ug naa na sila sa luwas nga kahimtang.
Matod ni Legaspi, ang suspek nag-atubang og mga kasong pagpatay, illegal possession of firearms ug kanhi konbiktado.
Samtang, ang unang biktima, gihulagway niini nga usa ka
high profile nga piniriso kinsa ilang gibantayan gumikan kay giingong nalambigit kini sa dautang binuhatan nga suma pa sa
acting warden dili mahitungod sa gidili nga drugas.
Si Legaspi dili pa makasulti kon unsay motibo sa suspek sa pagdunggab sa unang biktima.
“He didn’t know why he was stabbed because they know
each other,” dugang niini. Wa usab magkaaway ang duha kaniadto.
Human sa hitabo, nakakuha og mga improvised nga hinagiban ang mga jail guard ug gitigom usab sa bosyo ang mga lider sa mga selda.
Suspendido usab ang katungod sa pagbisita sa suspek samtang wala pay resulta sa imbestigasyon sa krimen. /