Mipalit og shabu gipusil, patay

Nipalit og shabu gipusilsamtang pulis niunay sa pagsakop sa iyang igsuon nga naglambigit sa pagpayuhot og gidilig druga sa dakbayan sa Talisay.

Si Jhon Beboy Abaquita, 26, minyo ug taga sitio Pio Village, Barangay Dumlog giingong nipalit og shabu sa Sitio Magay, Barangay Tanke apan gipusil-patay.

Sumala sa kapulisan, ang suspek giila base sa mga nakasaksi nga si Titing Mangaron, hingkud ang panuigon, ug taga Sitio Rattan, Tanke.

Sa imbestigasyon sa kapulisan, nasayran nga ang biktima gikan nipalit og shabu.

Dihang nipauli na, gisundan sa suspek ug walay daghang istorya gipusil ang biktima makadaghang higayon.

Dali untang gidala sa Talisay District Hospital, apan gideklarar sa mga mananambal nga patay nang midangat sa tambalanan.

Ang gikatahapan daling nisibat human sa hitabo.

Nakuha sa crime scene ang upat ka kabhang sa kalibre .45 ug tulo ka gagmay nga pakite nga gitouhang shabu.

Nagtuo ang kapulisan nga bahin sa ilegal nga drugas ang motibo sa krimen.

Sa laing bahin, pulis niunay sa pagdakop sa iyang igsuon nga aduna’y warrant sa kasong may kalabotan sa ilegal nga drugas.

Si SPO3 Nestor Canlobo, kanhi sakop sa Talisay police ug karon nadistino sa Cebu Provincial Public Safety Company (PPSC) sa Cebu Provincial Police Office (CPPO), nangulo sa pagsilbi sa warrant

of arrest sa iyang igsuon nga si Christopher Canlobo alyas Etcho, taga sitio Hawod, Barangay Bulacao.

Si SPO3 Canlobo giubanan sa kapulisan sa Talisay pinanguluhan ni SPO4 Rolando Andales sa pagsilbi sa warrant nga giisyu ni Judge Glenda Go sa Regional Trial Court (RTC) Branch 65 bahin sa drugas.

Ang dinakpan gitanong sa Talisay Detention Cell.