Gilubog ug gilawgaw

SuperBalita Cebu - - SUPER BIRADA - Bobby Nalzaro (bobby@sunstar.com.ph)

Dili angayan mokompiyansa ang kapulisan nga nag-imbestigar sa kamatayon ni Bien Unido, Bohol Mayor Gesila Bendong-Bondiel sa pagpangalap o pagkuha og dugang mga ebedensiya batok sa iyang bana, Bohol Provincial Board member Nino Rey Boniel, gumikan kay gisugdan na sa paglubog ug paglawgaw sa iyang mga abogado ang kaso. Gikinahanglan ang kanunay nga koordinasyon sa kapulisan ug piskaliya sa Lapu-Lapu City diin gipasaka ang parricide batok kang Bokal Boniel ug mga akusado.

Kini gong kasong kriminal gikinahanglan nga i-konbikto ang akusado nga way lama sa pagduha-duha o beyond reasonable doubt. Kon adunay lama sa mga pagduda, paborable kini sa akusado. Ug posible maabsuwelto ang mga akusado. Ug kon ma-absuwelto ang mga akusado, dili na ra ba maka-apelar ang prosecution sa taas nga hukmanan.

Nganong naka-ingon ko nga gisugdan na sa paglawgaw kining kaso ni Boniel sa iyang ngilngig nga mga abogado? Si Gerry Carillo, usa sa mga abogado ni Boniel, miakusar sa mga pulis nga gipugos ug gihulga ang mga kauban ni Boniel pagkomiter sa krimen nga mi- execute og affidavit nga nagtumbok sa opisyal nga maoy nipatay sa mayor. Matod pang Carillo nga gi- torture sa mga pulis ang mga saksi.

Gusto ni Carillo nga mo-imbestigar niini ang Commission on Human Rights (CHR) ning maong akusasyon. Aw, niining puntuha, makatabang og dako ang media. Gikinahanglan mo- secure ang prosecutor sa ilang mga interviews sa mga saksi nga nagpakita nga wala sila pugsa.

Ikaduha, gipalutaw ni Carillo nga buhi si Mayor Boniel kay matod pa nakatawag o gitawgan pa sa iyang higala nga taga Bohol mga pipila ka oras human siya "patya."

Porbida, si Carillo morag butalo ug banga na siyang pagka-abogado kon iyang i-insister kining maong theory. Posible nga ang cellular phone ni Mayor Boniel diha ni Bokal Boniel human siya patya. Unya misugo si Bokal Boniel og higala nga patawgan ang maong cellphone ug iyang gitubag. Nagtuo siguro si Carillo nga "namatay" usab ang cellphone ni Mayor Boniel dungan sa kamatayon sa mayor.

Newspapers in Tagalog

Newspapers from Philippines

© PressReader. All rights reserved.