Panginabuhian

Motangkod na og usa ka tuig karong buwana sukad nga gisugdan ang higpit nga kampanya batok sa illegal nga drugas sa administrasyon ni Presidente Rodrigo Duterte. Sa mao nga kampanya, kapin sa usa ka milyon ang ningtahan ug liboan na ang napatay, dunay napusilan sa kapulisan samtang ang kinabag-an, wa mahibaw-i kinsa ang naghimo. Human sa pagsurender, daghan ang namalik sa pagpamaligya og drugas.

Kadaghanan kanila namalik pagpamaligya tungod kay wa silay alternatibong kapanginabuhian. Drugas ra ang ilang kapanginabuhian.

Usa ni sa dakong hagit sa kagamhanan nga hangtod karon, gamay ra ang nahimo. Kining paghatag og kapanginabuhian sa mga nang-surrender mao ang dakong kakuwangan.

Di lang drug rehabilitation nga pasilidad ang gikinahanglan, kon di alternatibong panginabuhian alang sa mga tawo nga namaligya og drugas.

Sa ato pa, duha ang nag-una unta sa mga aspeto sa kampanya, pag- rehabilitate sa mga drug user ug paghatag og panginabuhian niadtong mga tawo nga nangsurender.

Di makapaabot ang kagamhanan nga mobiya sa labing sayon nga paagi ang mga tawo nga namaligya og drugas tungod kay duna usab silay batakang mga panginahanglan sama sa pagkaon ug ubang mga bayranan.

Busa, ning pagsulod sa ikaduhang tuig sa kampanya batok sa ginadiling drugas, mas maayo nga mogahin na ang kagamhanan og dakong kantidad alang sa livelihood program sa mga durugista.

Bisan pag kapila ni sila mosurender, mobalik gihapon sila sa pagpamasin tungod kay kini aron pagtubag sa panginahanglan.

Basta ang tiyan magkutoy, bisan unsa na lay moabot sa huna-huna sa tawo nga iyang buhaton aron magpakabuhi.