Your love inspires me
Dugay kong gitan-aw si Roman. Nagtinutokay mi. Duna koy gustong klaruhon sa iyang nawong. Ug mao gihapon ang nakita ko, ang kalumo sa iyang hitsura, ug ang kabuotan sa iyang tinan-awan nako. Gusto kong tugkaron hangtod ang kinahiladman sa iyang kasingkasing.
Ug mao gihapon ang akong nasuta niya. Sensiro siya sa iyang paghigugma nako. Apan nahadlok ko. Ang pagbiya ni Papa namo ni Mama, maoy nagpugong sa gusto kong mahitabo, nga sugton ko siya.
Ang gugma ni Roman maoy naghatag og kadasig nako sa pagpaningkamot ug sa pagpailob aron molampos ko sa akong gipangandoy nga makahuman og kurso. Ug karon nia siya, naghangyo na sab nako nga mokuyog ko niya sa gawas.
“Bisag karon lang, Salome, nga birthday nako. Malipay na ko nga ikauban tika sa pagpangaon sa gawas.”
Nasabtan nako sa tingog ni Roman nga nagpakiluoy siya. Kaluoy? Hagbay pa kong naluoy niya? Apan lagi, nahadlok ko nga basig pasakitan lang ko niya sa umaabot parehas sa gibuhat ni Papa kang Mama.
“Basig dunay makakita nako, Roman. Nakahibawo na bitaw ka nga duna sab koy laing mga suki dinhi. Makaingon unya sila nga mokuyog na diay ko sa pagpanggawas uban sa laki.”
Nakakita kog katarongan aron di ko makakuyog kang Roman sa gawas. “Di sab tingali, uy, Salome.
Please, o, ayaw ko balibari. Karon lang lagi. Pagkahuman ani, di na ko mohangyo nimo sa pagpanggawas.”
Wa ko motubag. Miinom ko sa akong Red wine. Mitungab sab si Roman sa beer sa iyang baso. “Basta, ha, karon lang?” Nakadesisyon ko nga paundayonan si Roman. Bisag dim light ang suga sa sulod sa
night club, apan naklaro ko sa nawong ni Roman ang gibati niyang kalipay. Kaha, tungod ani, nakuptan niya ang usa ko kamot.
Hinay kong gikuha ang akong kamot.
“S-Sorry, Salome. Nakalitan lang ko tungod sa subrang kalipay nako ron. You know
why? Kay para nako, ang imong pagpakigsawo og pamahaw nako unya maoy labing importanteng regalo nga akong nadawat ning akong
birthday ron.” Nahikatawa na lang ko. Balaknon man diay ning akong
suitor, hilom kong nakaingon. Apan sa pagkatinuod lang, nalipay sab ko nga ikauban ko si Roman sa pagpangaon sa gawas.