TAMBAGI KO, NOY KULAS

Bentaha

Dear Noy Kulas,

Nagdako ko sa akong iyaan nga dalaga kay ang akong parents nagbuwag dihang bata pa ko. Ang akong mga igsuon gibahin sa akong parents. Maingon nga nagbuwag buwag ming tanan.

Bisan ani, love nako ang akong mga igsuon kay maayo gihapon ang among relationship. Usa na lang namo ang wa pa maka graduate nga among gitabangan og gasto.

Ang among papa maoy maayo pagkabutang kay yutaan sila ug duha ra ka magsuon. Karon nagbinahinay na sila sa yuta. Mao ni karon ang problema kay gus- to sa iyang igsuon nga mas daku ang iyang bahin kay naa kuno niya sila si Lolo ug Lola. Siya ang naggasto sukad pa sa una sa ilang parents kay naa na lagi laing pamilya ang akong papa mao nalayo siya. Sa Mindanao na nakabase ang among papa.

Pwede ba diay na ang gusto sa among uyoan? Di diay equal ang lot nga bahinon? Ang amo ra bang apohan pabor sa igsuon ni Papa. Pero kaming mga apo o pagmangkon di mosugot. Unsa may among buhaton ani? Amo ba kaha siyang ikiha? Daghang salamat, Noy. DONDON Don,

Pakig-estorya una mo sa inyong amahan kabahin nianang inyong stand sa pagbinahinay sa ilang properties. Kay suma sa balaud, bahinon nga patas ang mga kabtangan nga masunod sa mga anak gikan sa ilang mga ginikanan. Di na mahimong estoryahon lang or ingnon nga siya ang maglabi sa binahinay kay naa niya ang parents nila. Maayo unta kon duna silay agreement prior nianang iyang pagsulti karon. Anyway, paestoryaha ang imong amahan ug iyang pamilya aron kini maresolbar.

Kon mosugot ang inyong amahan human sa dialogue, ayaw na lang kaha ninyo siya pugsa kon di siya gusto og gubot o magkabangi ang pamilya ninyo. Apan kon moinsister mo, konsulta mo og abogado. Sagad sa ingon niani, anha ra ba magsugod sa barangay. Gikinahanglan ni nga resolbahon sa barangay una pa kini iadto sa korte. Mao ni ang naandan nga proseso sa mao nga kaso.

Kon di lang kaayo dako ang kalainan sa bahinay, ayaw na lang ninyo padak-a nang butanga. Mas maayo nga magpabilin ang maayong relasyon sa pamilya.