CAVALIERS INTERESADO NI GEORGE
“I don’t think you can deny (Russell) Westbrook the MVP. I just think he’s done something special and his team did well, and he was the sole responsibility for it. James Harden has a case no doubt.” – Ginebra coach Tim Cone
Human nipadayag si superstar Paul George sa iyang tinguha nga mobiya sa Indiana, ang Pacers management nagsugod na dayon sa pagpangita og posibleng ikabaylo sa ilang pambato.
Daghang mga tinubdan sa ESPN ang nagkanayon nga nga usa sa mga gitawagan sa Pacers aron makigsabot kabahin kang George mao ang Cleveland Cavaliers.
Si George nipahibalo na sa Pacers nga molugnot kini sa katapusang tuig sa iyang kontrata aron mahimong unrestricted free agent sa sunod season sa National Basketball Association (NBA).
Wala maglangan si Pacers general manager Kevin Pritchard ug nihimo dayon kini’g lakang sa pamasin nga makakuha og maayong tanyag gikan sa teams nga interesado sa four-time All-Star.
Nag-average si George og 23.7 puntos, 6.6 rebounds, 3.3 assists ug 1.6 steals sa regular season sa bag-uhay lang nahuman nga season. Ning puntoha nga nagkaduol na ang NBA draft, gilaumang usa si George sa mga mahimong sumsoman sa mga pagahisgutan.
Ang Cavaliers nipadayag og interes nga mokuha kang George apan wala kini mipasalig og longterm contract, matod sa usa ka tinubdan.
Gituohan nga si George maoy kuwang nga tipik aron masulbad sa Cavaliers ang usa ka tanghaga sa ilang panagribal sa gitawag og
“super team” nga Golden State Warriors.
Ang labing pambato sa Cavaliers nga si four-time MVP LeBron James dugay nang nakadayeg sa abilidad ni George.
Ning puntoha, ang Cavaliers padayong pang naghunahuna kon unsa’y lakang nga ilang pagabuhaton aron makuha nila si George.
Sa pito niya ka mga tuig sa NBA ubos sa kampo sa Pacers, si George gikonsiderar usa sa nanag-unang mga magduduwa sa liga.
Giingon nga usa sa mga rason nga nakahunahuna si George sa pagbiya sa Pacers mao ang nagkahuyang nga puwersa niini.
Sama sa tanang mga magduduwa, gusto ni George nga moduwa sa team nga adunay dakong potensyal nga makalangkat og korona.
Aduna sa’y poruhan nga mabalhin si George sa Los Angeles Lakers gumikan kay lumad man kini nga taga California.
Si George nipadayag nang daan nga pangandoy niyang makaduwa alang sa iyang yutang natawhan.
Nagpasabot lang kini nga kon dili makaduwa si George sa Cavaliers diin hayaghayag ang poruhan nga maangkon ang labing una niyang titulo sa NBA, gituohang sa Lakers siya mabalhin.