DIVER NAHUTDAN OG OXYGEN, NAOSPITAL

Diver nga gikan sa Bien Unido, Bohol nga nisalmot sa nagpadayong search and retrieval operation sa lawas ni Mayor Gisela Bendong-Boniel gitabang sa dihang naghutdan og hangin ang iyang scuba tank samtang diha ilawom sa dagat.

Gidali og dala si Mel Quaio sa Philippine Commission Sports Scuba Diving nga nahimutang North Reclamation Area, Mandaue City diin nahimutang ang decompression chamber.

Base sa pamahayag ni PSSupt. Romel Cabagnot, hepe sa Lapu-Lapu City Police Office nga kagahapon sa alas 11:12 sa buntag, namatikdan si Quaio nga naglisod sa pagginhawa samtang gipahigayon ang retrieval operation sa Olango channel.

Nabantayan sab nga mora og nawad-an sa panimuot ang maong diver nga anam nga nahulog sa kantilado nga bahin ug wa gilayon maka-inflate sa iyang buoyancy control device (BCD) jacket aron unta ma-normalized ang iyang pag-utaw utaw.

Giingong wa kabantay si Quaio nga nahurot na diay ang hangin diha sa iyang tanke.

Gitabang si Quiao ubang divers og pasaka paingon sa nagpa-abot nga sea ambulance sa Lapu-Lapu City government diin gihatagan ug first aid sa Emergency Rescue Unit Foundation (ERUF) nga luwan nang daan sa maong sakayan.

Kagahapong adlawa adunay upat ka divers gikan sa Bohol ug pito sa Lapu-Lapu City nga padayon sa pagpangita sa lawas ni Mayor Boniel.

Atol niining pagsuwat giingong luwas na sa makuyaw nga kahimtang si Quaio.

Samtang, habol nga nakuha sa mga diver nga nangita sa lawas ni Mayor Gisela ipakita sa mga saksi kon mao ba ang gamit sa dive camp nga giputos sa lawas sa biktima.

Sa TV lang nakita nilang Roilito Boniel alyas Etad ug Randel Lupas ang habol.

Matod nilang Etad ug Randel nga sa ilang tan-aw di susama ang nakuhang habol itandi sa giputos sa lawas ni Mayor Gisela nga gisakay sa pump boat sanglit dunay rebete sa kilid sa habol.

“Murag dili to mao kay puti man tong giputos kang mayor nya katong nakuha lain man tog color,” matod ni Lupas.

Ipasusi usab ang habol sa PNP Crime Laboratory aron kuhaan og DNA sample.

Ang sample nga makuha itandi sa mga kabanay sa mayor nga una nang nakuhaan og sample sa kapulisan.