Mga alternatibong dan gipang-ayo

Gisugdan na og trabaho sa Department of Public Works and Highways ug contractor ang pag-ayo sa pipila ka mga karsada sa siyudad sa Sugbo nga gamiton isip alternatibo nga agianan sa higayon sugdan na ang pagtukod sa underpass sa eskina Natalio Bacalso Ave. ug dan F. Llamas. Si Engr. Roy Dela Cruz, project engineer sa DPWH 7, nibutyag nga sugod niadtong Martes gikwadrado og una ang mga karsada dapit sa Tagunol tungod kay kini ang dunay daghang mga libaong.

Siya nipasabot nga kinahanglan ikwadrado daan ang mga libaong nga karsada aron inig butang sa aspalto mas molig-on ug mokupot. “Kon irregular ang shape sa

hole, dili siya makakupot (sa aspalto),” dugang ni Dela Cruz sa Superbalita Cebu.

Matod niya sud sa duha ka semana dako na sila og maagi sa contractor ug daghan nang matapakan nga mga lungag ug libaong nga mga karsada nga magsilbi nga diversion roads sa higayon himuon ang rerouting sa mga sakyanan kon sugdan na ang pagtukod sa P638 milyones nga underpass.

Si Dela Cruz nanghinaot nga kon mapaspasan ang pagayo sa mga lungagon nga karsada tugtan na sila sa Cebu City Transportation Office makapahigayon sa ikaduhang dry run. Ang CCTO wa modayon sa paghimo sa ikaduhang dry run tungod sa mga libaong nga mga karsada nga nakapalangay sa pag-irog sa mga sakyanan.

Ang DPWH ug CCTO nagkasabot nga tapakan una ang mga libaong ug lungag sa mga alternatibong agianan kon himuon og balik ang dry run.

Apil sa nauyonan ang pagbutang og mga traffic ug directional signs nga maggiya sa mga sakyanan kon asa moagi o malahos.