Dunay negusyo sa drugas sud sa CPDRC?
Way illegal nga drugas nga nakaplagan sa gihimong surprise inspection sa Cebu Provincial Detention and Rehabilitation Center (CPDRC) sa Barangay Kalunasan, Cebu City sa alas 7:00 sa buntag niadtong miaging Huwebes.
Ang mga ang mga sakop sa Provincial Pulic Safety Company (PPSC) nga nihimo sa greyhound operation nakasakmit gihapon og mga kontrabando sama sa mga drug paraphernalia nga naglakip sa mga tin foil ug mga lighters ug mga cellular phones.
Ang gikahibudngan mao ang pagkasakmit sa mga money remittance records gikan sa mga binilanggo. Duna bay negusyo sud sa CPDRC? Unsa man kining negusyoha? May kalambigitan ba kini sa illegal nga drugas?
Si Roberto “Bobby” Legaspi, ang CPDRC acting jail warden, niingon nga sayo pa kaayo ang pagsulti nga ang mga money remittance records gikan sa illegal nga drugas.
“For now, we are not sure if these are drug transactions. Maybe, they are for personal usage only. That is why an investigation has to be done first,” he said.
Masayran kini kon may kalambigitan ba kini sa illegal nga drugas pinaagi sa pagsusi sa nagpadala sa kuwarta ug sa gipadad-an niini. Ang makapatingkag sa dunggan kon ngano nga daghan og kuwarta ang mga binilanggo sa CPDRC.
Sumala pa ni Legaspi, ang money transaction records nga na-recover sa kapulisan nagpakita nga mokabat sa P40,000 ngadto sa P70,000 ang gipadala sa ubang mga binilanggo sa CPDRC matag adlaw ngadto sa usa ka money remittance outlet.
Ang uban sa maong mga money remittance records nakuha gikan kang PO2 Antonio Aguisanda, usa ka kanhi sakop sa kapulisan nga napriso sukad niadtong 2014 tungod sa kasong robbery.
Ang ubang mga pinisirso mopadala sa kuwarta ngadto kang Aguisanda nga maoy mopadala niining ngadto sa gawas. Nakakita na tingali ang mga piniriso sa CPDRC og maayong paagi sa panginabuhi.