Drugs, krimen, terorismo

Sa dagan sa mga panghitabo sa atong palibot ug karon, dili ang pag-abuso sa gidiling drugas tataw nga nagunang hinungdan sa pagkaylap sa kriminalad labi na sa paghimo sa usa o pipila ka tawo sa labing ngilngig nga salaod ug ang pagduslit og kaisog sa mga sakop sa teroristang grupo sama sa Maute sa dakbayan sa Marawi.

Nakahinumdom ba kamo sa taho nga adik nga batan-on nilugit sa duha ka mata sa lola nga nag-edad og kapin sa 80-anyos dihang gibalibaran sa pagpahilot sa naulahi? Ang balita bahin sa inahan gisumbag-patay sa inahan sa anak adik human wala mopatuo sa sugo? Kon tarong pa sila sa paghunahuna, mahimo kaha nila kini nga salaod? Kini ug daghan pang kaso sa tibuok nasod nga nahimo tungod sa pagkaulipon sa gidiling drugas.

Ning ulahing kalamboan sa kagubot sa Marawi City, naugkat ang minilyon nga kantidad sa shabu sa balay nga gihimong base sa Maute group. Dili lang seguro kini negosyo apan dakong posibilidad nga ang mga sakop sa Maute nga gibala sa pag-ataki sa militar ubos sa espiritu sa shabu busa walay tugpatugpa ug walay kahadok moasdang? Sa miaging adlaw, minilyon usab ang kanrtidad sa shabu ang nakaplagan sa kapulisan sa balay sa bise mayor sa Marawi.

Ang sangko sa langit nga kalagot ni Presidente Rodrigo Duterte bug-at og basihanan hinungdan nga taliwala sa alegasyon batok sa kampanya sa gidiling druga sa administrasyon, nagpabiling taas og trust rating nga 75 percent sa presidente.

Bisan ang tinahod nga host sa HARDtalk sa BBC nga si Stephen Sackur klaro nga wala motuo sa pagpangdaut ni Sen. Antonio Trillanes IV sa administrasyon nga nahimong pahoy sa maong interview, labi na sa iyang pag-ingon nga dili halapad nga problema sa nasod? Naulipon seguro sa gidiling drugas ang motuo ni Trillanes.

Kon tarong ang imong hunahuna, seguradong masuko ka sa pagpahuyot sa gidiling drugas.