From the bottom of my heart
Para nako, di ko angay hatagan og dakong pagtagad si Jay. Makalagot gyud siya, uy! Giisnab niya ang akong beauty. Kadaghang lalaki nga nakigsuod nako sa eskol, ah. Ang uban nangulitawo pa nako. Apan si Jay morag di mi silingan, morag duna koy sakit nga mananakod. Kaklaro, ah, nga naglikay siya nako!
“O, naunsa ka na man sab, Malou? Kabuntag pa aron unya isog ka nag nawong?”
Nagkadungan mig sulod si Carol sa gate sa university nga among gitunghaan anang pagkaugma sa buntag. Nagkaabot mi. Mao pa say iyang pag-abot sa eskol.
“Da! Ang unggoy nga dako! Gipalagot na sab ko!” Gipusdak kog kusog ang akong tingog.
Ang kanahan kong amiga, igo lang mingisi. Gihan-an ko siyag hapak sa akong kamot. Dali kaayo siyang nakalihay. “Love na kana, uy, Malou!” “Unsay love? Kon siya na lang, may pag matiguwang kong dalaga!” Gikusmoran ko si Carol. “Tua ka na man nuon mosimpatiya sa unggoy, uy!”
“Wa ko mosimpatiya kang Jay, Malou. Concern lang ko nimo. Hunahunaa lang gud, kanunay kang masuko tungod niya. Unya, maka- concentrate
ka ana sa imong pag- eskuwela?”
Kausa mikuyog si Carol nako sa among balay. Ug nakita niya si Jay. Maong nakaila siya ani. Gisugilon ko niya nga esnabero si Jay nako.
“If I were you, Malou, makig- boyfriend na ko. I
mean, sugta ang usa sa imong mga suitors.”
“Unya wa man koy nagustohan nila? Gusto ko, uy, nga
love gyud nako ang guy nga akong boyfriend.”
“Aw, naa ra man diay na, Malou. Sugta si Jay.”
“Unsa?” Nadako ang akong tingog. “Unsay sugton nga wa man siya mangulitawo nako? Aw, di ko niya, uy! Naglagot man ko niya!”
“Lagut-lagot lang na, uy, Malou. Tan-awa unya, one of
these days, masuta nimo sa imong kaugalingon nga nahigugma ka niya.”
“Ayaw gani ko sulug-suloga, Carol.”
Gihan-an ko na sab og hapak sa akong kamot ang akong amiga. Nagkatawa siyang midagan pahilayo nako. Unya sa didto na siya sa layo, gilingi ko niya. Gisigahan ko siya sa akong mga mata. Mingisi lang ang kanahan dayong sulod sa iyang classroom. Mipaingon sab ko sa akong classroom. Unya nahunahuna ko ang gisulti ni Carol.