Ikauwaw ba kaha ko?

Dear Papa Joe,

Tawga lang ko sa ngan nga Timoy, 40-anyos na ko ug minyo, ug may tulo ka mga anak. Ang akong suliran kabahin sa akong asawa nga sa akong tan-aw mura man siya og ika uwaw ko niya. Dili siya proud nako o may kasuya lang ni siya sa akoa kay bisan wala ko kahuman og kurso pero nahimo ko nga barangay official diri sa Cebu. Ako ang duolon sa mga tawo. Ilado ko sa amoa pero kon naay presentasyon sa among barangay. Maorag di siya ganahan mosuporta. Kon moadto man siya sa kalihukan unya mokuha og mga hulagway kay ang akong mga kauban maoy kuhaan ug ako tinapsing lang.

Sa tinuod, dili man gud ko gwapo ug gwapa ni siya. Sa una pa ni siya dihang uyab pa mi, di sad ko niya ipasigarbo sa iyang mga kauban. Feeling nako nahigugma siya sa tawo nga di niya gitawag og ideal man. Pero kon kami rang duha, okay man siya. Maura siyag mamili ba og sud-an unya kay gigutom na man, mokaon na lang bisan way lami alang niya. Mao ni ang akong suliran kay sa tinuod, masakitan baya ko. Please tambagi ko.

TIMOY

Timoy,

Ang importante nagkahigugmaay man mo ug ning kalibutanong reyalidad, naa ang gitawag og pride o garbo. Basin tuod tinuod nga di siya proud nimo unya di siya gusto makadungog nga biaybiayon ka sa laing tawo. Kay basin sa kailado nimo, na over confident ka unya masakitan lang ka kay igtalikod nimo, napuno ka sa saway.

Ang relasyon di man sad sa tanang panahon ato nalang sab nga ipasigarbo. Maayo man sad nga naa tay privacy. Usa pa, 40 na ka. Hagbay ra siguro mo nagbuwag kon wa gyud siyay gugma nimo. Kana lang ug daghang salamat sa imong tampo. PAPA JOE