Karaang barko magpabilin pa: Marina
Dili pa ipatuman sa Maritime Industry Authority (Marina) ang pagwagtang sa daan nga mga barko nga nagpanuigon og 35 ka tuig ug pataas.
Si Marina 7 Regional Director Jose Venancio Vero, Jr. niklaro nga plano pa lang ang pagparetiro sa mga barko nga sobra sa 35-anyos ug wala pay opisyal nga kamandoan gikan sa Department of Transportation.
“But as of now, wala pa tay concrete o kanang approved nga kanang 35 years old nga i- retire na. Wala pay formal declaration, study-han pa nato,” sumala sa bag-ong director sa Marina 7.
Si Transportation Secretary Arthur Tugade unang nipahibawo sa miaging tuig nga wagtangon na ang mga barko nga nagpangidaron og 35 ka tuig ug sobra, aron paglikay sa disgrasya sa kadagatan.
Apan, matod ni Vero nga sa ubang nasod, kon itandi, dunay mga barko nga sobra na sa 35 ka tuig na, apan maayo pa.
“If I am ask personally, it is more on maintenance and the equipment,” dugang niini.
Matod niya nga usahay dunay madisgrasya nga bag-o pa nga mga barko.
Si Vero nidugang nga duna hinuoy bag-ong regulasyon ang Marina nga nagdili na sa mga kompaniya og barko pag-import og mga barko nga sobra na sa 15-anyos.
Suma pa niini dunay mga bag-ong barko sa nasod apan mga gagmay lang.
Usa niini ang bag-ong barko nga ginama gikan sa shipyard sa lungsod Balamban nga sa miaging semana lang gipagawas.
“When it comes to bigger vessel its hard to get a new vessel considering nga atong shipyard dili capable mobuilt og mga bigger vessels,” dugang ni Vero.
Kini ang hinungdan ang ubang mga tag-iya og barko mopalit og second hand gikan sa laing nasod sama sa Japan, Korea, China ug gikan sa Europe nga sobra na karon sa tulo ka dekada ang panuigon.
Sa miaging tuig, si kanhi Marina 7 Regional Director Nanette Dinopol namahayag nga naka- draft na sila og memorandum circular alang sa maong tinguha ug gi-review na sa ilang buhatan labi na sa Domestic Shipping Service Office ug kon kini mahuman mopahigayon sila og public consultation sa tanang stakeholders sa maritime industry alang sa ilang sugyot ug komento.