Buhi kaha si Mayor Boniel?
Gawas sa denial ug alibi o panghimakak nga siya maoy mipatay sa iyang asawa, giinsister usab ni Bohol Provincial Board Member Niño Rey Boniel nga dakong buhi si Bien Unido Mayor Gesila Bendong-Boniel ug nga atoa kini sa Dubai uban sa iyang langyaw nga boyfriend o kulukadidang. Kini nga anggulo una nang gipalutaw ni Atty. Gerry Carillo, usa sa mga abogado ni Bokal Boniel. Didto kuno miaagi sa southern backdoor si Boniel. Ang backdoor mao kanang Tawi-Tawi, paingon sa Sabah, Malaysia. Kon adto ka moagi didto, wala nay immigration papers nga gikinahanglan.
Sa iyang affidavit, matod ni Bokal Boniel, nga misibat ang iyang asawa gumikan sa kadako sa utang niini. O ba kaha nagpapatay-patay aron lang makalikay sa utang. Kon utang lang, nganong mosibat man ang tawo nga wala may napriso sa utang? Civil case ra na ug puwede nga maareglo. Pero unsa ba kadako kanang maong utang nga dili puwedeng maareglo sa mayor?
Kon mao kini ang gi-insister ni Bokal Boniel, dan gikinahanglan nga pamatud-an niya kining maong anggulo. Kon sa eninglis pa ang burden of proof naa sa depensa.
Kay kon mapamatud-an ni Boniel nga dakong buhi ang iyang asawa, aw, walay kasong parricide. Kon didto man miaging si Gesila sa Kuala Lumpur, Malaysia paingon sa Dubai, aw, duna gyud nay immigration records nga magpamatuod nga miabot siya ning maong mga nasud.
Ug karon unta nga naa pa sa prosecutor's office ang kaso i-presentar niya aron makombensi ang mga piskal ug dili na masang-at ang kaso sa korte.
Laing rason ni Boniel nga dakong buhi ang iyang asawa kay, matod pa, nakig-estorya pa kini sa usa ka columnist sa Bohol Chronicle nga si Raul Gatal pipila ka oras human gidagit ang mayor.
Gitawgan ni Gatal ang cellular phone sa mayor ug mitubag kini 18 ka oras na human siya "patya."
Gipangumusta niya ang mayor ug mi-ingon kini: "I'm okey, we will just talk. Gi- loud speaker pa gani kuno ni Gatal ang iyang cellular phone ug dihay laing mga tawo nga nakadungog.