KINATAWO SA BANA GILAPWAAN

PULIS NAAKTUHAN SA MISIS NGA MAY DU'G NGA BABAYE

Kinatawo sa pulis napaso human siya gilapwaan og pinabukal nga tubig sa iyang asawa nga nasuko og maayo human siya maabti nga dunay babayeng kauban pagkatulog sa lawak sa police station.

Wa mag-eskandalo ang asawa sa police station, apan iyang gitawgan ang iyang bana sa pag-uli sa ilang balay sa dakbayan sa Toledo buntag niadtong Hunyo 21.

Mga ngan sa bana ug asawa gipugngan ning mantalaan.

Nag-ilis na unta ang pulis, apan sa kalit lang, gibuboan siya og tubig pinabukal sa iyang asawa tumong sa dughan ngadto sa bilahan hinungdan sa pagkapaso niini, lakip na ang iyang kinatawo.

Wa masayod ang Pinamungajan police station sa hitabo hinungdan nga nahibung sila nganong wa na makatunga ang pulis sud na sa pipila ka mga adlaw.

Si Sr.Insp. Margienette Yosores, chief sa Womens and Children Protection Desk (WCPD) sa Cebu Provincial Police Office, niingon nga iyang gipasusi unsay kasaypanan sa pulis.

Matod pa ni Yosores nga mga alas 5 sa kaadlawon niadtong Hunyo 21, ang asawa sa pulis kalit nga nibutho sa Pinamungahan police station.

Naaktuhan niya ang banang pulis nga natulog sa abli nga lawak sa police station.

Diha sa lingkuranan natulog tupad ang usa ka babaye nga naghigda sab sa bangko.

Si Yosores nipadayag nga way kagubot nga nahitabo kay ang asawa nipauli.

Pagkasayo sa buntag, gitawagan ang pulis sa iyang asawa aron mopauli ug mag-estorya sila.

Pagka alas 9 sa buntag naabot ang pulis sa panimalay ug samtang nag-ilis, kalit siyang giyab-ag nagbukal nga ininit tubig.

“Sa kalagot guro sa asawa kay nasakpan niya nga naay babaye, giakto na nag-ilis ang banang pulis gibuboan sa nagbukal nga tubig,” dugang ni Yosores.

Tungod sa hitabo, maayong pagkahilos sa dughan, tiyan, paa ug sa kinatawo hinungdan nga wa maka-duty.

Matod ni Yosores nga natingala ang kadagkuan sa Pinamungahan police nganong wa kini maka-duty.

Matod ni Yosores nga gipasumiter na nilag investigation report ang Pinamungahan Police.

Si Yosores niklaro nga bisan kon di mopasakan og kaso ang asawa, mohimo silag aksyon sa pagsusi sa administratibang kasaypanan sa pulis.

Gipaabot sab nila kon mopatim-aw ang asawa sa WCPD.

Sumala pa niya nga di nila pasagdan kining maong gihimo sa pulis kon tinuod nga public knowledge na iyang gihimo, ila kining pitulon.

Gipadayag niya nga tungod sa ka busy karon nila sa ubang gimbuhaton, di malikayan nga mataligam-am nalang ang malaw-ay nga binuhatan sa pipila ka badlungong pulis.

Sa imbestigasyon mahibawkon nganong ang maong pulis wa mabadlong nga magdala og babaye sa police station.

Bisag wa pa sila maghalog, nag-kiss o maghubo, usa ka kalapasan sa usa ka pulis nga duty nga magdala og babaye unya magdulog sa pagkatulog.

Hayan mag-atubang og kasong administratiba ang pulis.

Ang asawa gikatahong milayas human sa hitabo tungod sa kahadlok. /