PAGBALIGYA SA LUNA SA SRP GIUYONAN
Mobaligya ang Siyudad sa Sugbo sa tulo ka hektaryang parsela sa luna sa South Road Properties (SRP) nga gibana-banang mohalin og P3.3 billion.
Kini human nga 13 sa 17 ka mga sakop sa City Council nga nanunga sa regular session ningpabot alang sa ordinansa nga giduso ni Konsehal Nendell Hanz Abella isip supplement sa City Ordinance (CO) 2332, nga nanalipod sa SRP ug stakeholders gikan sa supak sa balaud ug way pagtugot nga mga transaction.
Ang parsela nga ibaligya naa lang sa duha ka mga dapit sa Pond F nga gilangkuban sa Lot 1-F-8-A nga dunay gidak-ong 25,769 square meters (sq. m) ug Lot 1-H-1 nga dunay gidakong 3,349 square meters.
Matod ni Abella nga ang City Government mokita og P110,000 matag metro kwadrado kon kini ibaligya.
Mga mopalit mahimong motingob sa pagbayad o modata niini og kaduha, diin ang 50 porsyento bayran sa pagpirma sa mga dokumento sa pagbaligya subay sa public auction.
Ang nahabiling katunga bayran human sa pag-uyon sa Commission on Audit.
Sa wa pa kini aprobahi, ang ordinansa gilalisan sa oposisyon ug administrasyon.
Mga konsehal nga sakop sa Barug Team Rama niingon nga wa na kinahanglana nga mopalabang og ordinansa kay ang resolusyon paigo na.
Apan ang administrasyon niingon nga mao kini ang gitugot lang sa Department of Interior and Local Government.
Aron mahunong ang lantugi, si Konsehal Jose Daluz III nisugyot nga si Abella mousab sa ilang ordinansa nga magtugot sa mayor nga mobaligya sa luna, inay nga supplement lang sa CO 2332.
Human sa 25 minutos, giaprobahan ang ordinansa.
Pabor mao sila si Konsehal Abella, Margarita Osmeña, Joy Augustus Young,Sisinio Andales, Eugenio Gabuya Jr., Alvin Arcilla, Jerry Guardo, Mary Ann delos Santos, Dave Tumulak, James Anthony Cuenco, Eduardo Rama Jr., Philip Zafra ug Daluz.