Kadudahang grupo sa Talisay nabantayan

Kadudahang mga tawo namatikdan karon sa dakbayan sa Talisay.

Kini maoy gibutyag ni Konsehal Raul Cabañero, presidente sa Associaton of Barangay Council (ABC), human niaktibo nag balik ang mga Barangay Intelligence Network (BIN) sa ilang sa siyudad.

Sa miaging semana, ang 22 ka mga kapitan sa Talisay gipatawag ni Mayor Eduardo Gullas aron tukion ang labot sa hulga sa mga terorista.

Lakip sa mitambong ang mga sakop sa Military Intelligence Group (MIG).

Si Cabañero niingon nga aduna nay mga kapitan nga nitaho kaniya nga aduna nay mga tawo sa ilang tagsa-tagsa ka barangay nga wa nila mailhi.

Aduna usay report nga adunay mga pumpboat ang nidunggo sa kabaybayonan sa Tangke ug Poblacion nga giluwanan sa mga lalake.

Iyang giawhag ang kapulisan ingon man mga opisyal sa barangay nga kanunayng magmabinatayon ilabi na kadtong mga coastal barangay.

Hinuon giklaro ni Cabañero nga wa siya magsulti nga dautan kining maong mga tawo, apan kon di sila dautan, kinahanglan nga mo-report sila ngadto barangay hall ug magpaila sa ilang kaugalingon aron adto buhaton ang profiling.

“Sa ako lang sa Bulacao, tag alas 5 gyud na sa kaadlawon mogawas, moagi sa barangay. Mga babaye ug lalake magtaptap sa nawong,”matod ni Cabanero.

Samtang si konsehal Gail Restauro niingon nga sa ilang barangay sa San Isidro aduna usay nagpuyo sa usa ka apartment ang nireklamo tungod kay aduna nay namuyo nga duha ka tawo apan inig panahon sa gabii, managhan.

Apan ang mga lalake nga moadto sa apartment pulos magtaptap sa ilang nawong hinungdan nga nahadlok ang mga nagpuyo sa ubang lawak sa apartment.