Bogus rice, posible?
Ang paggamag bogus o fake rice posible. Apan nga kini gibaligya na karon sa mga merkado sa nasod usa ka imposible. Ning panahon nga bisan ang tawo makopya o ma- clone na, way butang nga di mapeke.
Ang paggama og fake rice sa plastik sa komersyal nga gidaghanon di katuohan. Una lugar, lisod kini sa pagtago sa mata sa tawo labi na sa mga business rival nga mobulgar dayon sa maong ilegal nga buhat.
Mahimo ang fake rice alang sa exhibit sa mga game show o tiaw nga panladlad sa publiko. Di pangbaligya o pangsagol sa tinuod nga bugas humay kay dali kaayong masakpan sa paghikap lamang.
Tungod sa isyu sa fake rice nga nakadaot kuno sa nakakaon nilihok dayon ang National Food Authority (NFA) sa pag-imbestigar. Way fake rice nga namatud-an bisan sa Food Development Center sa Manila.
Ang kanunayng isagol mao man ang low quality rice ngadto sa good quality nga maoy ihata sa mga pumapalit sa mga tikasan o mapahimuslanon nga rice traders alang sa dakong ganansiya.
Manghingusog ni panahon sa lean months period (HulyoSeptiyembre) diin magkanihit ang supply sa humay kay tingtanom kining panahuna.
Modagsang dayon ang shortage kay tagu-tagoan man dayon ang humay sa mga negusiyanteng mapahimuslanon.
Kon nihit ang bugas humay mosaka sa tagilapaw dayon ang presyo. Kon maatlan nga sapar-sapar lang ang supply sa NFA magping-t sa tumang kalisod ang katawhan samtang magkagiki ang mga negusiyante tungod sa dakong ganansiya..
Ang grains retailer gawas sa maayo mopahimus sad. Kay mag-allocation na man ang NFA ning higayuna, ang ilang bahin itumod dayon sa mga higanteng trader alang sa sa kaalautan sa mga consumers nga di makakaon og baratong humay.
Kuyaw hunahunaon kay tungod unya sa kanihit sa bugas humay ang mga kabos nga daghan sa atong katilingban mokaon na lang sa bisan unsa nga magpaninggit kon asa na ang gikagubtan nga fake rice kay ilang kan-on! Kapait nato unya.