From the bottom of my heart
Namatikdan nako nga nagtan-aw sab si Jay namo ni Ronnie. Midip-ig ko pag-ayo kang Ronnie. Gipakita ko kang Jay nga malipayon sab ko niadtong tungora. Unya mikupot ko sa usa ka kamot ni Ronnie. Sa tan-aw ko niya, nahibulong siya sa akong gibuhat. Apan wa ko na hunahunaa kon unsa man ang iyang pagtuo nako niadtong higayona.
“Tan-awa ra gud nang buwan, o, Ron. Very romantic, di ba?”
Gibuhian ko ang kamot ni Ronnie ug gitudlo ko ang buwan nga niadtong tungora full moon.
“Bitaw, no, Malou. Sus, hayag man diay ang buwan.”
Mitan-aw ko kanila ni Jay ug Layna. Wa na ko makadungog sa kusog nga katawa ni Jay. Nagkadikit man lang gud ang among balay ug dug-ol ra kaayo ang among mga terrace. Gikuptan ni Jay ang kamot ni Layna ug gipatindog. Nanulod sila sa balay.
Mipalayo dayon ko sa pagdip-ig kang Ronnie. Ang tuyo ko lamang sa pagpakita kang Jay nga sweet mi si Ronnie aron sa pagpalagot sab niya. Apan nasayop diay ko, uy. Maglagot kaha si Jay nga wa man gani siyay maayong pagtagad nako? Ug nganong maglagot man sab kuno siya kon pananglitan boyfriend ko si Ronnie?
Na, nakatsansing nuon si Ronnie nako kay mikupot ko sa iyang kamot ug midip-ig ko pag-ayo niya. Sus, akoy alkanse sa akong gibuhat. Basig magtuo si Ronnie nga nakagusto na ko niya. Simbako uroy! Hilom kong nakaingon. Di gyud nako type si Ronnie.
Mitindog ko ug nagpasumangil nga mitan-aw sa gawas.
“Init man diay dinhi, Ron. Adto ta sa sala kay tuay electric fan.” Mitindog si Ronnie ug mitando. Wa na ko maghuwat pa niya, miuna kog biya sa terrace ug mikanaog ko sa silong, sa ground floor diin mahimutang ang sala. Milingkod ko human ko palingkora si Ronnie sa akong atbang. Wa ko molingkod sa taas nga sopa kay basig motupad siyag lingkod nako.
“Kining, Malou, ning higayona gitagaan mo akog paglaom.” “Ha?” Puwerte nakong kuganga sa akong nadungog. Ug nahunahuna ko dayon nga ang pagkupot ko sa iyang kamot ug pagdip-ig ko pagayo niya maoy iyang gibasehan nga love ko na siya. (SUMPAYAN)