ROTA USBON ATOL SA ASEAN
APEKTADO ANG POPE JOHN PAUL II AVE., SERGING OSMEÑA AVE., DUOL NGA MGA KARSADA
Gawas sa hugot nga seguridad nga ipatuman, duna usay kalitkalit nga mga reroutinga ipahigayon ang mga awtoridad atol sa 17th Asean Foreign Ministers Meeting nga karong Hulyo 1-7 sa dakbayan sa Sugbo.
Ang duha ka dagkong mga karsada nga maapektuhan mao ang John Paul II Avenue ug Serging Osmeña Blvd. ingon man ang sikbit niini nga mga karsada.
Dili dugay ang mga rerouting kay kon mahiagi na ang mga delegado, ibalik ang naandan nga dagan sa trapiko.
Bisan kon way hulga, hugot nga seguridad ang ipatuman sa kapulisan ug Philippine Army sa pito ka mga hotel sa Sugbo nga maoy estaran sa mga delegado.
Hinayhinay usab nga mangabot karong adlawa ang mga foreign minister gikan sa lainlaing nasod sa South East Asia hinungdan nga gipahugtan pa ang seguridad.
Si Konsehal Dave Tumulak, deputy mayor on police matters, nagkanayon nga plantsado na ang preparasyon sa kapulisan ug mga security
protocol nga ipatuman alang sa hingpit nga kalampusan sa panagtagbo sa mga delegado.
Gipadayag sa konsehal nga mopatuman usab og re-routing matag karon ug unya ang City Traffic Operations Management (Citom) pinangulohan ni Francisco Ouano, operations head sa Citom matag biya sa mga foreign minister sa ilang mga hotel nga giistaran paingon sa Radisson Blu Hotel.
Laing rerouting ang ipatuman sa higayon nga sila mopauli gikan sa Radisson paingon sa ilang hotel nga temporaryo nga gipuy-an.
Ang mga karsada nga apektado kaayo mao ang Serging Osmeña blvd. sa North Reclamation Area ug ang Pope John Paul II avenue sa Barangay Mabolo ug pipila ka mga karsadang kasikbit niini.
Gihangyo nila ni Tumulak ug Ouano ang publiko, ilabi na ang mga commuter, sa pagsabot sa rerouting sanglit di kini nila ipatuman og dugay.
Ablihan ra usab nila dayon ang main road kon mahuman ang convoy sa mga delegado.
Ang mga personnel sa Metro Manila Development Authority (MMDA) motaod usab og mga security camera sa mga billeting hotels alang usab sa monitoring sa mga delegado aron maseguro ang ilang kaluwasan.
Matod ni Tumulak nga adunay hugot nga kooperasyon tali sa Philippine National Police, Highway Patrol Group, Philippine Coast Guard, Maritime Industry Authority ug ubang ahensiya sa gobiyerno alang sa naasoyng kalihukan.
Pipila ka mga adlaw sa di pa ang tigom, makita na ang kapulisan sa kadalanan sa dakbayan sa Sugbo. Labing minos 5,000 ka ma security personnel ang ipakatap sa nagkadaiyang dapit sa Metro Cebu alang ning mao nga tigom.
Kini naglakip sa mga sundawo ug kapulisan.