DRUG LORD MAS DAKO PA KANG JAGUAR
Labaw pa kang Jeffrey Diaz alyas Jaguar si Marie Ann Maglasang, giingong drug lord nga nasikop sa mga awtoridad sa San Francisco, Camotes Island, Cebu niadtong Hunyo 26, tungod sa kadako sa drugas nga mahalin niini.
Sa ilang nakuha nga impormasyon, dunay usa ka adlaw nga makabaligya ang kapuyo ni Maglasang nga si Christopher Cobrado og duha ka kilo nunot sa kadaghan na sa ilang
drug dealer sa gawas. Duna siyay 13 ka mga luhong panimay nga iyang napanunod sa iyang bana nga nabilanggo sa New Bilibid nga pangabaga ni Peter Co, usa sa mga labing dakong drug lord sa nasod, apan napatay atol sa nahitabong riot sa bilanggoan sa dihang gisuwayan ug dunggab si Co.
Matod ni Philippine Drug Enforcement Agency (PDEA 7) Director Yogi Filemon Ruiz nga sa ilang listahan, dunay 19 ka mga level 2 drug personalities ug pito na lang niini ang nagpabiling gawasnon.
“Sa among assessment ani, mas dako pani siya ni Jaguar. Tiaw mo nang nay siyay 13 ka balay nga nagkantidad ang usa og more or less P3 million,” matod ni Ruiz.
Gitinguha nila nga maimbargo pabor sa gobiyerno ang mga naangkon ni Maglasang.
Tungod sa malampuson nga anti drug operation, dako ang posibilidad nga ang Barangay Union sa San Francisco, mataktak sa listahan sa mga
drug-cleared barangay. Sa 10 ka mga barangay sa lungsod, siyam niini ang nasuta nga dunay tigamitan sa illegal drugs.
Sa Hulyo 4, ipatawag ang mga kapitan sa maong lugar alang na unya sa paghukom sa sitwasyon sa ilang barangay.
Nibahad si Ruiz nga mag-atubang og kasong administratiba ang mga barangay official nga wa mo- monitor sa ilang konstitwente nga mibalik na sa paggamit sa illegal nga drugas. Franz Sabalones
Samtang, naa na sa Court of Appeals ang kaso sa pag imbargo sa mga butang nga gihuptan ni Franz Sabalones nga unang gimandoan sa korte pagpugong nga kini mabaligya.
Matod si Ruiz nga basin mabawi sa gobiyerno ang mga kabtangan niini human masuta nga kini napalit tungod sa illegal nga negosyo ni Sabalones. Dunay mga balay nga gipatukod si Sabalones sa barangay Guadalupe ug wa pay labot niini ang lapad nga kayutaan ug high class nga resort sa lungsod sa San Fernando diin siya nagpuyo.