Kadudahang mga tawo nga anaa sa Talisay susihon

Pangulo sa Muslim community sa dakbayan sa Talisay ingon man ang kapulisan mosusi sa taho labot sa presensya sa mga kadudahang tawo nga nasigpatan sa ilang siyudad.

Una niini si Konsehal Raul Cabanero, presidente sa Association of Barangay Council (ABC) sa dakbayan sa Talisay, nibutyag nga aduna na silay namatikdan nga presensiya sa mga bag-ong panagway sa ilang mga barangay.

Hinungdan nga nanawagan siya sa mga opisyal ug katawhan sa pagtaho gilayon ngadto sa kapulsian samtang kuhaan kinig background ug mga pangan.

Iya usab nga giawhag ang mga kaigsuonang Muslim nga bag-o sa Talisay sa pag-adto sa barangay hall aron mahimuan og profiling tungod kay kon di sila dautang tawo wa usab silay angayang kahadlokan.

Si Hadji Malik Rasul, presidente sa Muslim community sa Talisay, nibutyag nga wa sila makadawat niini.

Apan miingon nga ila kining susihon kon tinuod ba ang taho nga gibutyag ni Cabanero.

Hinuon mipasalig sila nga silang mga Muslim nga anaa sa Talisay mga maayong tawo ug nagnegusyo lang sila ilabi na diha sa merkado sa Tabunok.

Matod ni Rasul nga sa matag higayon nga mopahigayon silag meeting uban sa kapulisan ilang ipasalig ang 100 porsiyento nga pagsuporta sa kapulisan pinaagi sa pag-report kon adunay ilang igsuon Muslim nga maabot sa Talisay ug di maayo ang record.

Samtang si P/SInsp. Albert Quilitorio, deputy chief sa Talisay Police Station, miingon nga wa usab sila makadungong sa report.

Apan iyang giawhag tinubdan sa balita sa pagpakig-alayon kanila aron ila kining masusi sa labing dali nga panahon.

Nasayran base sa record ni Rasul aduna silay 500 na ka mga sakop sa Talisay apan kadaghanan kanila dugay na kaayong nagpuyo sa siyudad.

Gani si Rasul mibutyag nga siya lang sobra na 20 ka tuig nga nagpuyong malinawon sa Talisay City.